السلام عليكم ورحمة الله وبركاته
معلش يا ماما استحمليني شويه ، انا ازعجتك بس حضرتك الوحيدة اللي بتريحني وتفسيراتك بتحقق بعون الله ،
المرة دي حلم واحد بس طوووووووووويل :
حلمت ان جدي المتوفي والد امي جالي في المنام ومعايا اتنين من خالاتي وزي ما بيكون بيعاتبنا على حاجة او بينبهنا لحاجة نسينها زيارة مريض ، صلة رحم او عزاء هي حاجة منهم . المهم شاورلنا على طريق مشينا فيه عشان نروح نعمل اللي طلبه مننا ، لقينا نفسنا في المدينة المنورة وانا فرحانة اني رجعت المدينة لاني كنت عايشة فيها وبحبها جدا وطول الطريق بقول لخالاتي هنا كذا وهنا كذا ،جدو سابنا ومشي واحنا ركبنا العربية خالتي الكبيرة ادام جنب السائق وانا ورا مع خالتي الصغيرة ، واللي بيسوق مش عارفة مين يا اما خالي او جوز خالتي واحد منهم .
المهم رحنا العنوان اللي احنا عايزينوا كان عبارة عن بيت بدورين مدهون ابيض ، طلعنا اربع خمس سلمات وخبطنا على الباب ودخلنا كلنا ، انا قعدت دقيقتين وطلعت الدور التاني عشان اكمل المطلوب ، طلعت الدور الثاني كان فيه شقة واحدة باباها على يمين السلم ، خبطت والبا اتفتح ، لقيت شقة حلوة جدا واسعة وبرضه مدهونة باللون الابيض ، دخلت لقيت على شمالي ترابيزة سفرة وكراسي سفرة بس ، وبعدين على اليمين ادامي انتريه اسيوطي ، اللي زي بتاع المصايف كده كسوته بيضه وفيها خطوط بالفضي او الرصاصي الفاتح اوووي ، وبعدين لقيت وسط الانترية ده كرسي انتريه صالون شيك اوي استغربت وجوده وسط الطقم ده مش ماشي معاه بس برضه نفس الكسورة بنفس الرسمة
المهم ببص لقيت البيت ده بيت شخص كنت اعرفه والمعرفة انتهت من سنة تقريبا ، لقيت اخواته كلهم جايين يسلموا عليا وانا كنت حريصة ان محدش يعرف اني كنت اعرفه ، لكن لقيتهم عارفين ومرحبين ، راح الانسان ده طالعلي من جوه وهو بيزعق وبيخبط وبيقولي ميرديكيش ان تعب 33 سنة يضيع بالطريقة دي، قالهالي 3 مرات ، انا رديت عليه بمنتهى الهدوء وقلت الاتي هو انا فتحت بقي ، هو انا قلت حاجة ، انا ساكتة اهه متكلمتش .
المهم اصروا انهم يصحوا مامتهم من النوم عشان تسلم عليا ، مامته كانت نايمة في اوضه ادامي باباها ابيض وفيها سريرين بني مفروشين بالابيض ، دخل يصحيها هو بطريقة وحشة انا قلت في سري ازاي بيتعامل مع مامته بالطريقة دي ، المهم الست كانت نايمة ما بين اتنين شكلهم طفلين قامت وجت سلمت عليا وبستني ورحبت بيا اوي ، انا سلمت عليها وجريت انزل تاني عشان اروح ، راحت اخته الكبيرة نزلت ورايا عشان تصالحني وتقولي مزعلش من الشخص ده وانا جريت وركبت العربية مع خالاتي تاني ورايحين على بيتنا ، المهم جت ورايا ورحت البيت عندنا كان في ستات كتير كانه احتفال مناسبة ، وانا كنت بوضب في البيت ومعايا حد من خالاتي بيساعدني مش فاكرة مين فيهم ، وهي ماشية ورايا اخته وعماله تقولي متزعليش ، قدري موقفه ، قدري تعبه وانا مش برد عليها . وبعدين لقيت حد جه من جنبي وقال متقوليش لأخواتك انها اخته لانهم هيقولوا لمامتك لو عروفا المهم ببص ورايا لقيت اخواتي عارفين بس سكتوا ومقلوش لماما وقمت من النوم على كده .
الحلم ده كان ما بين العصر والمغرب في نهار رمضان تقريبا من تلات اربع ايام ، انا اسنة 32 سنة قلقانة من قلة الجواز وشماته الناس ، مقدمة في شغل ومستنية الرد حالتي الدينية متوسطة ، خالاتي الإتنين الكبيرة سوسن والصغيرة سهام
وجدي المتوفي اسمه حامد ، والشخص ده اسمه يوسف واخته اسمها سمية ، ومامته زينب .
قوليلي بقى دا ايه مع العلم مكنتش بفكر فيه خالص ومفيش بينا اي اخبار او اي شئ تقريبا من سنة معرفش عنه حاجة ، اه الانسان ده مسافر بره بيدرس اللدكتوراه . ربنا يخليكي هتعبك معايا فسريلي الحلم ده
