الحلم رقم (5)
انا صليت صلاة استخارة على مشكلة وكنت بفكر فى حل معين ومش عارفة الحل اللى بفكر فيه صح ولا غلط وشوفت الحلم ده
حلمت ان انا كنت فى اوضة الضيوف وكنت بصلى صلاة العشاء لكن كنت واقفة فى اتجاه غلط مش اتجاه القبلة الصحيح وبعد ما خلصت صلاة العشاء سمعت صوت اخويا فى الشارع
قلت فى نفسى ممكن اخويا يدخل من برة عليا فأخذت سجادة الصلاة ودخلت فى اوضة تانى علشان كنت هصلى ركعتين سنة العشاء وحطيت سجادة الصلاة فى اتجاه القبلة الصحيح وكنت لسه هبدأ أصلى السنة سمعت اخويا
كان بيقول انه عايز يبيع الموبايل بتاعه واخويا التانى قال له ان الموبايل مش هيجيب اكتر من 30 جنيه فأخويا صاحب الموبايل قال خلاص انا مش هبيعه لان السعر قليل اوى وأنا بدأت اصلى السنة وكان جنبى سلم خشب بس قبل ما اصلى السنة كنت بفكر اصلى صلاة العشاء تانى بس رجعت فى كلامى وقررت اصلى السنة بس
يعنى صليت صلاة العشاء فى اتجاه القبلة غلط والسنة كانت فى الاتجاه الصح
معلش فى حلم تانى حلمت ان والدتى كانت بتعمل فطير اللى بنعمل منه فتة وانا اكلت من الفطير قبل ما يتعمل فتة اكلته حاف واختى كانت مستغربة وقالتلى بتاكلى الفطير حاف ازاى قولتلها عادى طعمه كويس وبعدين شوفنا غراب كان عايز يأكل من الفطير واحنا كنا بنحاول نبعده
انا آنسة وحالتى الدينية متوسطة
اختى آنسة
اخويا صاحب الموبايل عازب ومسافر
اخويا التانى عازب
