الحلم رقم (5)
حلمت ان انا كنت فى المدرسة وكنت قاعدة فى اول درج فى الفصل وكان علينا حصة وانا كنت بكتب الدرس والواجب
علشان المدرسة تصحح لى الكراسة لكن معرفش ايه اللى حص للكراسة لقيت جزء صغير اتقطع من الورقة اللى بكتب فيها الوجب
وقررت اكمل بدل ما اقطع الورقة واكتب من الاول وبعدين رحت للمدرسة علشان تصحح لى لواجب فهى بصت فى الكراسة
شافت الجزء المقطوع وشافت ان انا مش مكملة الواجب قالت لى مش هقدر اصححلك الكراسة بس انا مهمنيش قلت عادى
هبقى اكمل الواجب براحتى وبعدين اخليها تصححها لى وبعدين انا بصيت فى الدرج لقيت صاحبتى سايبة شنطة جوه الدرج وهى كانت غايبة
فأنا مسكت الشنطة وقلت هى ازاى سايبة شنطتها هنا ومش خايفة ان حد ممكن يسرقها وبعدين فتحت الشنطة اشوف فيه ايه
لقيت فيها فلوس فكة قديمة كان فى 5 قروش اللى مرسوم عليها الاهرامات وكان فى 20 قرش و10 قروش اللى مرسوم عليها نسر
وكان فى تانى بس مش فاكرة غير دول قلت فى نفسى يمكن هى محتفظة بيهم وبعدين لقيت شنطة على الارض بردو بتاعتها
بس كانت شنطة كبيرة قلت يمكن يكون فيها حاجة مهمة ورحت شوفتها فتحت السوستة لقيت جواها سوستة تانى فتحت السوستة التانية لقيت جواها سوستة تالتة
قعدت افتح فى سوست كتير لغاية ما وصلت فى الاخر لقيت جواها شنطة شكلها زى بتاعت رجال الاعمال
انا استغربت وقلت ياترى فيها ايه الشنطة فكرت اشوفها لكن رجعت فى كلامى وقفلت الشنطة تانى وبعدين دخلوا علينا مدرسين
وطلبوا مننا نقف صفوف زى الطابور بس مش فاكرة ايه السبب
المهم انا وواحدة صاحبتى روحنا بسرعة وقفنا فى اول الطابور وكان فى ولد زميلى اسمه مصطفى لما كنت واقفة قريب منه فى الطابور لقيته حاطط وجهه فى الارض قلت يمكن بيحترمنى وبعدين صاحبتى قالت لى ثوانى هتسأل الاستاذة فى حاجة وهترجع
قلت لها ماشى هستناكى وهو دخلت الفصل وانا استنيتها برة لقيتها اتأخرت فكرت ادخل عندها لكن رجعت فى كلامى
وقعدت مستنياها برة فى حوش المدرسة كنت بتمشى فى الحوش وانا بتمشى سندت ايدى على حيطة لكن لقيت الحيطة فيها كهرباء بس
ربنا ستر ولحقت نفسى وبعدين لقيت صاحبتى جاية عليا ومعاها شوية اوراق قلت لها اتأخرتى كده ليه قالت لى
ان الاستاذة طلبت منها تصوير شوية اوراق وكانت زعلانة شوية منى لان انا مروحتش معاها قلت لها معلش انا كنت مستنياكى برة
فى الحقيقة صاحبتى واحدة معرفهاش بس كان شكلها جميل
انا آنسة وحالتى الدينية متوسطة
