الحلم رقم(5)
حلمت ان انا كنت ماشية فى الشارع وكنت راجعة على البيت وانا ماشية على الرصيف والوقت كان بالليل
فجأة لقيت عربية شكلها قديم كانت معدية فى الطريق وواحد ماشى وراء العربية دى وكان بيقول
للسواق اركن العربية فى اى مكان لان فيها قنبلة
والناس اللى كانت ماشية اول ما عرفت ان العربية فيها قنبلة قعدوا يصرخوا ويجروا بسرعة
لان اكتشفنا ان الناس دى اعداء وعايزين يقتلونا وانا مكنتش قادرة اصدق
قلت فى نفسى يمكن تكون كاميرا خفية بس اكتشفت ان الموضوع بجد وقعدت اجرى بعيد
لغاية ما وصلت لمكان واحدة صاحبتى ساكنة فى المكان ده اسمها اسراء
قلت فرصة اروح اسلم عليها لكن كنت ناسية الشارع اللى فيه بيتها قعدت احاول افتكر مكان بيتها
لان انا مروحتش عندها من زمان اوى لانها كانت صاحبتى فى المرحلة الابتدائية
ولما افتكرت الشارع اللى هى ساكنة فيه روحت عليه وبصيت من بعيد على الشارع ووقفت
فى مكانى وانا مترددة لانى شوفت الشارع شكله مش نظيف وكان عشوائى
والشوارع داخلة فى بعضها خوفت منه ورجعت فى كلامى ومدخلتش الشارع وقلت خلاص مش هروحلها
وبعدين مشيت علشان اروح البيت وانا فى طريقى لقيت كلب صغير لونه ابيض مصفر شوية
ومنقط بالاسود بس مش كتير قعد يمشى ورايا لغاية ما وصلت البيت ودخل معايا البيت
وبعدين اختى شافت الكلب قالت مين جاب الكلب ده هنا قلت لها الحكاية فقالت لى بس اكيد مش هيقعد عندنا على طول قلت لها ايوه هنمشيه وكان عندنا قطة اتصاحبت مع الكلب وقعدوا يلعبوا مع بعض وبعدين قلت لاختى ان الكلب شكله نظيف وكإنه كان متربى عند حد
انا آنسة وحالتى الدينية متوسطة
واختى آنسة
وصاحبتى كانت معايا فى المرحلة الابتدائية فقط ومعرفش عنها حاجة دلوقتى
