تفسير احلام يوم الاربعاء الموافق 8\9 ان شاء الله

السلام عليكم. ازي حضرتك يا ماما نجيه
الحلم ده حلمته امبارح. حلمت اني مسافره في مؤتمر بره مصر في دوله اجنبيه. واني في الريسبشن بتاع الفندق ومعاي ناس كتير والمنظمين موجودين وبيتكلموا في الترتيبات والمحاضرات وكده. وكنت لابسه بنطلون وعليه بلوزه او تونيك مش فاكره وعلى ايدي بالطو. فجاه سوستت البنطلون باظت وبقت مفتوحه. وبقيت احاول اقفلها بايدي واداريها باللبس واحط البالطو ع قدام عشان ماتبنش بس الزرار كان موجود ومقفول. وبعدين وانا واقفه في الزحمه والهيصه الي موجوده. لقيت الاسانسير ولقيت الناس بتحط شنطها فيه. فقلت فرصه اريح نفسي من شنطة السفر بتاعتي وحطيتها في الاسانسير و روحت اكمل الاجراءات والتسجيل. وكان اللي بيسجلوا شباب مصرين ومحترمين .وقالوا لي لو احتجت حاجه تعالي لنا احنا هنا. وبعدين روحت عشان اطلع اوضتي فطلبت الاسانسير وكنت متوقعه اني هلاقي الشنطه فيه..لما نزل ملقتهاش ..وفضلت ادور عليها ودخلت مخزن للشنط المفقوده في الفندق ..ولقيته مليان شنط اشكال والوان واحجام مختلفه مرصوصه فوق بعض..حاولت افهم امين المخزن ان شنطتي ضايعه مفهمش.دورت في المخزن ملقتهاش برده. رجعت تاني للاسانسير وركبته وطلعت الدور التاني وكان اسانسير تعبان قوي..وخرجت في الدور التاني عشان اروح اوضتي بصيت لقية الشنطه مرميه جنب حيطه جنب الاسانسير بس فاضيه ومتكومه ع بعضها وكان لونها بيج او سكري. وصحيت ع كده.
انا انسه..اعصابي تعبانه الفتره دي جدا ومضغوطه قوي..دعواتك لي بالفرج والصبر .

حلم رقم 5
ازيك ماما نجيه
حلمت انى مع تيته فى غرفه وأنها فى بالى كانت تعبانه بس هيا
كانت قاعده معايا بقت كويسه و اتحسنت وإن ذينب بنت اخوها كانت جايه تزور وتشوف تيته وإن عمتو ناديه منعتها انها تدخل عند تيته وانى كنت قاعده اتكلم مع تيته وقلت ليها أن بنت اخوها جت تشوفها بس عمتو ناديه منعتها ف تيته زعلت وبكت وبعدين كأنى فى شقتنا وانى بتكلم فى تليفون وعمتو ناديه ردت عليا فقلت ليها عايزه اكلم تيته ولما تيته ردت عليا سألتها عامله ايه وهيا قالت الحمد لله كويسه والباقى مش فكر اه
ماما نجيه تيته توفت من 9 شهور

ازيك ماما نجيه
كل سنه وانتى طيبه
حلمت أن بابا مات وانى كنت بعيط بشده وان أختى أحلام قالت أن ممكن نستنا أسبوع ونتكلم مع عمو بخصوص حقنا عنده فأنا قلت ليها لا مش هنستنا وأننا هنتكلم على طول
ماما نجيه هو احنا لينا أرض وشقق عند عمو بتاعتنا وهو حاطط أيده عليها واحنا بنحاول نرجع حاجتنا منه وبابا عايش

سلام عليكم ماما نجية
انا حلمت انى فى شقتى اللى كنت فيها قبل ما أطلق وكان طليقى لسة جوزى وبيقولى هنزل اصلى الفجر بس بيقولها ببرود ومش مدينى وش زى ماكان فى الحقيقة اللى هو عايز انفصال وبعدين نزل وفضلت مستنية لحد ما الصبح بدأ يطلع وشايفة الصبح من تحت عقب الأبواب والشبابيك وانا قلقت أنه أتأخر فعمالة ارن عليه وهو مش بيرد علية فزعلت وعرفت انه مش عايز يرد عشان عايز الطلاق فبعدين وصعبان علية نفسى انه ليه بيعمل فية كدة وعايز يسيبنى ليه وانا معملتلوش حاجة المهم لقيت امى واختى معايا فى البيت لاقيت اختى بتقولى هاتى رقمه عشان ارن عليه فأنا روحت جايبة خددية من بتاعة الانتريه وجاية اكتب رقمه لقيت ايدى تقيلة مش قادرة تكتب وكل مااكتب الرقم ايدى تلغبط وتكتبه غلط 9 مثلا تتكتب 5 والارقام بالعربى طبعا المهم اول سطر مكملش الرقم لآخر المخدة بعدين جاية أكتبه تانى برضه ايدى تقيلة جدا مع انى حافظة الرقم وبردده فى مخى فى الحلم وحفظاه زى الرهوان لكن ايدى تقيلة فى الكتابة وبتلغبط كأنها مش حافظة وانا مستغربة وكررت الموضوع حوالى مرة او اتنين كمان فقلت لاختى طيب هاتى ورقة وقلم اكتب فيهم ولقيت برضه نفس الطريقة
الحلم التانى لامى وكان فى نفس اليوم المهم هى حلمت ان احنا فى شقة بابا او شقة العيلة وبعدين كنا عاملين عزومة سمك بلطى مقلى ورز وانا وماما بنحط والجو هيصة وكأن بابا الله يرحمه بيعزم الناس من ضمنهم واحدة انها بنت خالته واسمها غزة وبيقولها تعالى ياعزة فى حين انه فى الحقيقة بابا معندوش بنت خالة ولا قريبة اسمها عزة المهم فى اثناء كدة طليقى قاعد فى حتة ضلمة من البيت ومش باين وتقريبا فى نفس الصالة اللى فيها العزومة بس فى بعيد وفى حتة ضلمة وكمان اخت طليقى واللى من ضمن اسباب طلاقى ومش كويسة ناحيتى كانت قاعدة قريب من طليقى بس فى وش باب الشقة ومعاها طفلين تقريبا ولادها بس قاعدة لابسة ايشارب لحد نص شعرها وطبعا الايشارب زى بتاع زمان ومربوط ربطة قديمة المهم نص شعرها اللى باين من قدام بس من بعيد لونه ابيض جدا زى القطن وماما اما شافت كدة راحت تسالها عن كدة لقت شعرها عن قرب اسود بس اكرد جدا ووحش
انا 30 سنة مطلقة ومؤمنة الحمدلله
امى 55 سنة ومؤمنة الحمدلله

السلام عليكم ماما نجية
رأيت أنني في حجرة بها سراير و كأننا ليلا و سننام و النور مطفي لكن هناك إضاءة خارج الغرفة و دخلت اختي متزوجة و قالت إنها رأت في البيت ثعبان و خرجت ثم رأيت ثعبان أخضر كبير ملتف حول نفسه لم يكن يطير بل كأنه يطفو أو معلق في الهواء دخل الحجرة ثم خرج فجعلت أنادي أختي لتدخل و نغلق باب الحجرة و ننام. دخلت فتاة قد تكون احدى أخواتي ثم اختي ثم ابنتها الصغيرة التي بدت اصغر و كانت الطفلة بجوار الباب و يدها عَلى الباب فأدخل الثعبان رأسه و أخذ يلدغ يد الطفلة بهدوء و لم تكن الطفلة متألمة أو مهتمة. فأخبرت أختي فقامت و هشت رأس الثعبان كما نفعل مع الدجاج فعلت ذلك بهدوء فابتعدت رأس الثعبان. فأخذت أصيح ألم أقل لك تقفلي الباب يا منى مرتين. و بدت ابنة اختي بحالة جيدة و لم تكن أختي مهتمة و أنا تضايقت لأنني كنت ارغب بالنوم و لكن الان علينا أن نأخذ الطفلة للمستشفى فقط للاطمئنان و سعرت أنني متوترة اكثر مما ينبغي. عندما استيقظت استغربت لأن لي أخت اسمها منى و لكن من كانت في الحلم أخت أخرى و لا أعرف لماذا تأديتها منى.لم يكن الثعبان مخيفا في الحلم . انسة اعمل