تفسير احلام يوم الجمعة الموافق 8\21 ان شاء الله

رقم 1..الحلم بتاع والدى انه بيدينى ورقة مكتوب عليها 25 طريق 14 مايو ..و بيقرا الكﻻم اكتر من مرة ..شفت الحلم ده ليلة ما مات على طول يعنى اول حلم احلمه بيه و لسه متوفى هو ..ياترى الحلم ده له معنى ؟؟

حلم رقم 3 

انا حلمت اني كنت راكبه مركب صغيره كدا ف النيل قارب كدا مش مركب بمطور وكبيره لا دي حاجه عايمه كدا ع الوش وبعدين لقيت الميه ابتدت تدخل فيها والنيل كان عالي اوي والكلام دا كان بليل وكان في موج كتير ويخوف وانا كنت عماله بعيط اوي وماسكه ف حديده كدا ف القارب والقارب ابتدا يغرق وماما كانت واقفه علي الشط عماله اقولها ساعديني واعيط وهيا مش راضيه تساعدني خالص لغايه م قربت كدا من حتا ف الشط ونطيت بسرعه وطلعت من النيل

الحلم رقم 4
السلام عليكم ورحمه الله وبركاته
ازيك يا ماما عامله ايه
انا حلمت خير ان شاء الله ان حد بيخبط او بيرن على باب البيت فببص من البلكونه لقيت بابا الله يرحمه على الباب نزلت فتحتله واقعدت احضن فيه واقوله هوه انت يا بابا ممتش امال كنت فين بس كان جيبلنا حاجات كتير اوى معاه بس مش عارفه هيه ايه وحضنته كتير وفضلت وخداه فى حضنى واقوله انت وحشتنى اوى كويس انك ممتش وقلت اندهو نسمه تشوف بابا دى هتفرح كتير علشان هيه مكنتش شفته وهيه فى الحقيقه فى فتره مرضه ولما مات هيه مشفتوش علشان كانت مسافره فقلتله انت كنت فين انا مشفتوش انه قالى بس عرفت انه لما كان هيعمل عمليه خاف وساب المستشفى واحنا افتكرناه مات وبعد كده اتعالج ورجعلنا وهوه فعلا فى الحلم جه كان شكله جميل وخافف وبصحته علشان كده قال انه اتعالج بس انا فضلت وخداه فى حضنى كتير
مع العلم ان بابا توفى من سنه و8 شهور وتوفى وهوه بيعمل عمليه قلب مفتوح

الحلم ٥
ماما انا حلمت خير اللهم اجعله خير اني انا وزوجي ف حفلة ومع ناس كتير بيقولوا انهم اخوات زوجي وزوجاتهم وف الحقيقة انا معرفهموش وف سيدة عجوزة قاعدة ف النص وبيدوها علب شيكولاتة زي اللي بيباركولها ولاقيت واحد انا عارفاه هو زميل زوجي اسمه احمد مصطفى بيديني علبة شيك اووي بيقولي دي بمناسبة النونة الجديدة (منة ) اسم بنت فتحتها لاقيت فيها مصحف ووردة جميلة اوي وخدتها وانا فرحانة ولما فتحتها اوريها لزوجي لاقيتها مع المصحف والوردة معها شيكولاتة كتييير
انتهى الحلم
انا وزوجي حالتنا الدينية متوسطة ولسه ربنا مش كرمنا باطفال