الحلم رقم (5)
حلمت ان انا كنت قاعدة فى اوضة نوم زمان كنت بنام فيها وكنت قاعدة على الارض وحاسة ان انا فى دنيا تانية وكنت حاسة بمحبة من ربنا وكنت حاضنة نفسى وفجأة لقيت راجل شيخ قاعد جنبى وعملى حركة بإيده على عينى الشمال فحسيت ان عينى بتحرقنى جامد فقال لى انتى عندك وسوسة فى الصلاة قلت له ايوه وبعدين سكت افتكرت انه هيعالجنى لكن لقيته قاعد ساكت فأنا قمت من على الارض وقعدت على السرير وكان الوقت بالليل بس الصبح كان قرب يطلع خلاص فأنا قلت للشيخ انا هنام شوية صغيرين وهقوم تانى لسه بشد الغطا علشان انام لقيته بيقولى وانا كمان عايز انام شوية وقعد جنبى على السرير ونام على جنبه اليمين وكان مدينى ضهره قلت كويس لانى كنت خايفة منه وانا كنت حاسة بفرحة معرفش ليه وكنت لسه هنام والحلم خلص على كده وبعدها صحيت من نومى فجأة
فى الحقيقة الشيخ بيساعدنى فى حل مشكلة من فترة بس لسه متحلتش لغاية دلوقتى ومش عارفة اكمل مع الشيخ ده ولا ابتعد عنه لانى بصراحة انا خايفة منه
كان فى حلم من فترة حلمته حلمت ان انا جبت كرسى خشب زى الكراسى بتاعت القهوة وحطيت الكرسى قدام الحمام وباب الحمام كان موارب شوية وانا قعدت على الكرسى وكنت بتكلم مع الشياطين اللى جوه الحمام وكإنى بتفاهم معاهم على حاجة بس مش فاكرة الكلام خالص بس كنت واثقة فى نفسى وانا بتكلم ومكنتش خايفة
انا آنسة وحالتى الدينية متوسطة
