الحلم رقم (6)
حلمت ان كان عندنا فى البيت عزومة والناس الحاضرة كانوا اشخاص غريبة
وكان فى شباب بيدخلوا البيت بالموتوسيكلات بتاعتهم وهما سايقين وانا كنت واقفة فى الطرقة بتاعت شقتنا
وكنت مستنية اى شاب من اللى بيسوقوا الموتوسيكلات يركبنى معاه ويوصلنى لاخر الطرقة لان انا كنت واقفة عند اول الطرقة
المهم كل شاب كان يعدى قدامى كنت بقول فى نفسى يمكن اى شاب منهم يركبنى معاه ويوصلنى لكن هما قعدوا يعدوا من قدامى ومحدش قدملى المساعدة
فأنا زعلت منهم وقررت ان انا امشى لغاية اخر الطرقة لوحدى ومركبتش مع حد منهم وهما لما شافونى زعلت وهمشى لوحدى عزموا
عليا ان انا اركب معاهم
قالوا لى انهم كانوا بيهزروا معايا لكن انا زعلت من هزارهم ومشيت لوحدى وانا فى طريقى فى الطرقة دخلت المطبخ لقيت اخويا
ووالدتى قاعدين يأكلوا مع شخص صديقى وصديقى كان لابس بدلة زى العريس
فأنا قلت لهم معلش مكنتش اعرف انكم قاعدين بتأكلوا قالوا لى انهم كانوا جعانين وبيأكلوا لقمة خفيفة على ما العزومة تبدأ كان قدامهم
حلة ارز ومش فاكرة باقى الاكل
المهم انا خرجت من المطبخ وسيبتهم يكملوا اكلهم وانا لما خرجت من عندهم ضحكت بصوت عالى شوية كنت بضحك لانى دخلت عليهم وهما بيأكلوا
وبعدين كملت مشى لاخر الطرقة لقيت ناس من المعازيم بتجهز وبعدين رجعت تانى دخلت المطبخ لقيت والدتى وصديقى قاعدين كانوا خلصوا اكل فأنا قعدت
جنب صديقى على اليسار وحطيت رجليا الاتنين فوق قدمه اليسرى وكنت حاسة بالدفئ وانا حاطة رجليا على رجله فهو طلب منى احط رجليا الاتنين على رجليه الاتنين او اقعد على رجليه فأنا قلت له لا كفاية كده
وكنا قاعدين مبسوطين وبعدين جاء شخص وكان معاه ورقة اعطاها لصديقى لما انا بصيت فى الورقة معاه لقيت صورة بنت شكلها
مش محترمة ومكتوب بياناتها بخط الايد بقلم حبر ازرق وكان خط اى كلام
وكان مرسوم فى الورقة رسومات اشخاص زى رسم الاطفال
فأنا ركزت اوى فى الورقة كنت بحاول اعرف مين دى فهو قال لى انها حبيبته بس انا مسمعتش كلمة انها حبيبته بوضوح
بس زعلت وحسيت ان بطنى اتقلبت وحسيت انى هتقيئ فنزلت رجلى من على رجله قال لى مالك خليكى قاعدة
قلت له انا بطنى اتقلبت وحاسة انى هتقيئ لكن متقيئتش بس انا كنت زعلانة منه وخدت جنب ولميت شعرى على ورا لانى كنت سايبة
شعرى لكن شعرى كان مش طويل كان واصل تحت الرقبة تقريبا بس كان ناعم وجميل
قعدت ألعب بأصابعى فى اطراف شعرى وكنت متضايقة منه وهو كان جنبى وانا مكنتش ببص له لانى زعلانة فلقيته مد ايده وشال
شعرى اللى نازل على وجهى قرب عينى
وقال لى انتى سامعانى قلت له ايوه فقال لى انا عاجبنى خط الآيلاينر الازرق اللى على جفن عينيكى وكان لونه ازرق فاتح فأنا بصيت
لوالدتى وقلت لها إلحقى اسمعى ده بيقول ايه
انا اصلا مش عاملة آيلاينر فى عينى فوالدتى قالت لى هو كلامه صح انتى فعلا عندك آيلاينر طبيعى لونه ازرق فاتح من وانتى صغيرة
فأنا انبسطت وقلت له ده طبيعى
انا مش زى الناس اللى بتقعد تحط مكياج والحاجات دى قلت له ان الطبيعى احسن طبعا وكان فى واحدة قاعدة معانا وكانت
حاطة مكياج كتير على وجهها ولما سمعت كلامى زعلت وقامت تمشى
قلت لها انا بهزر هو الواحد ميعرفش يهزر مع حد وبعدين انا زعلت وقلت هو ايه اليوم ده
وصديقى ووالدتى قعدوا يحاولوا يفهموها ان انا بهزر معاها
فى الحقيقة صديقى كان بيحبنى لكن حصلت مشاكل وسيبنا بعض من فترة كبيرة
انا آنسة وحالتى الدينية متوسطة
صديقى عازب
واخويا عازب ولا يعمل
