الحلم رقم (4)
حلمت انى كنت فى المدرسة وقابلت مدرستين سلمت عليهم وقعدت مع واحدة فيهم بس كانت مشغولة مع الطلاب لان الطلاب كانوا بيتخانقوا وهى كانت بتحاول تحل المشكلة بينهم
وقالت لهم احكوا لى ايه اللى حصل بالتفصيل وطلبت منهم يمثلوا اللى حصل فأنا لقيت نفسى وسط الاولاد اصحاب المشكلة وابتدو يمثلوا اللى حصل ويقولوا لبعض الفاظ سيئة
ومش عاملين حساب ان انا وسطهم فانا مشيت بعيد عنهم وبعدين قعدت أتمشى فى حوش المدرسة شوية وبعد كده رجعت تانى للمدرسة اللى كانت بتحل مشكلة الطلاب لكن لقيت اختى واصحابها قاعدين معاها فأنا ابتسمت لها من بعيد
وموقفتش معاهم علشان اختى
وبعد كده خدت شنطة المدرسة بتاعتى علشان كنا مروحين وقررت امشى لوحدى
واول ما خرجت من باب المدرسة مشيت على الرصيف بس مفيش خطوتين ولقيت استراحة على الرصيف وقاعدين عليها رجالة وانا كنت مكسوفة اعدى قدامهم فحاولت اعدى ورا الاستراحة علشان ميشوفنيش
لكن مقدرتش فنزلت من الرصيف وعديت الطريق الناحية التانية
وكان فى ايدى سماعة كمبيوتر اللى هى بتتلبس فى الرأس وانا فى طريقى لقيت واحدة مجنونة معاها شنطة بتمرجح فيها فأنا خفت تخبطنى بيها بس قلت انا هعدى وخلاص وربنا يستر
وعديت جنبها وخبطتنى بالشنطة بس قالت لى معلش وبعدين طلبت منى انها تاخد السماعة اللى كانت فى ايدى قلت لها لا قالت لى ليه قلت لها علشان هتكسريها ومشيت وضحكت فى نفسى علشان قلت لها هتكسريها
وبعدين كنت بعدى شارع تانى فلقيت سيارة جاية تدخل الشارع فوسعت لها بس كان فى سيارة تانية جاية عكسها فشالتها فوقها يعنى السيارتين بقوا فوق بعض
بعد كده السيارة وقفت علشان ينزلوا السيارة اللى فوقها والناس كلها وقفت تتفرج وانا كمان كنت واقفة معاهم وبعد كده كملت طريقى فضلت ماشية على الرصيف وبعد كده قابلت بنات مسيحيين كانوا زملائى
فى الثانوى بس مكلمتهمش وبعد كده وقفت علشان اعدى السيارات لانى خلاص وصلت للشارع بتاعى
بس الوقت كان بالليل فأنا وقفت ونزلت شنطتى وقلت هدخل السماعة فى الشنطة علشان محدش يشوفها فى الشارع وبعد كده قعدت اظبط الحجاب بتاعى
وكان فى بنتين صغيرين تقريبا فى اعدادى سمعتهم بيقولوا انهم مستنيين مواصلات لكن ليهم شروط كان نفسهم ييجى ميكروباص فاضى ومحدش يركب معاهم
فلقيت واحدة منهم بصت لى وقالت لى انتى ليه واقفة هنا قلت لها متخافيش انا مش مستنية مواصلات لانى وصلت خلاص هعدى الشارع بس وهدخل شارعنا
فقالت لى اصل احنا مبنحبش حد يركب معانا وخصوصا لو كان رجالة
قلت لها معاكى حق وقلت هو المفروض يعملوا سيارات خاصة للبنات وسيارات خاصة للرجال علشان ميحصلش الاختلاطات دى ونتضايق
وبعد كده انا سيبتهم وعديت الشارع ودخلت شارعنا وانا ماشية فجأة لقيت البنت جات ورايا وقعدت ماشية معايا لغاية ما قربت اوصل لبيتى بس هى تعبت وقالت لى انتى بيتك فى اخر الشارع وانا كنت مبسوطة منها لانها ونستنى فى الطريق
وبعدين هى مشت وبعد كده معرفش ليه انا رحت رجعتلهم تانى وقعدت معاهم شوية وقلت للبنت انا خدت الشارع رايح جاى ولسه هروح تانى علشان اروح بيتنا وانتى مشيتى فيه مرة واحدة وتعبتى
أنا آنسة وحالتى الدينية متوسطة
