السلام عليكم ورحمة الله وبركاته
ازيك يا ماما نجية مبروك يا ماما لسارة بنتك ، بصي يا ماما انا حلمت امبارح فجر الخميس بعد صلاة الفجر على الساعة ستة ونص الصبح لغاية 9 ونص الصبح ، حلمت ان انا واقفة في شقة كبيرة ، وواسعععععة جدا ، الشقة فيها صالة كبيرة فيها صالون وسفرة ، و4 غرف نوم كل غرفة نوم ليها طرقة خاصة بيها طويلة ، وفيها حمامين ، الحمام الاول لونه بمبه والبانيو بتاعه كبيرررررررر ولونه بمبة اوي ، والحمام التاني في دش وتواليت وزي حمام بلدي او بانيو قدم لونه ابيض ، والمفروض انه في الحلم النهارده فرحي او تحديدا ليلة زفافي وانا محتارة اتجوز في انهي اوضه منهم ، ازوض النوم الاربعة واحدة منهم فيها غرفة نوم كاملة لونها بني ، والغرف الثلاثة الباقيين فيهم انتريهات ومع الانتريه فيها كنبه استديو كبيرة من اللي بيتفتحوا سرير ، انا قعدت ساعة الف في الاوض الاربعة اختار انهي اوضه تبقى غرفة جوازي انا وجوزي ، المهم اخترت اوضه اللي فيها انتريه لونه ما بين البيج والبني وكنبة استديو كسوتها لونها اخضر درجة من درحات الاخضر ، وقلت هي دي الاوضه بتاعتي وخرجت انادي على جوزي المفروض ، وكان فيه ناس كتير في الشقة معايا ، المكان اللي ادخله يدخلوا ورايا ، المهم خرجت لجوزي اندهله ، لقيت راجل ابيض اللون ، صوته صوت شاب صغير لكن شكله شكل راجل كبير في السن شعره ابيض كمان ، قالي استني مش هنتجوز دلوقتي احنا لسه صايمين وكنت ماسكة انا وهو كاسة فيها مياه او عصير ، انا يدوب شربت شربة واحدة من الكاسة قبل ما يقولي احنا صايمين استني لما نكسر صيامنا او نخلص صيامنا وانا فعلا قلت انا شربت شربة واحدة خلاص مش هكمل شرب الا لما نخلص صيام وقمت من النوم على كده .
اناانسة 32 سنة غير مخطوبة ولا متزوجة ، مقدمة على شغل في الجامعة ومجاليش رد منهم لسه ، حالتي النفسية وحشة جدا جدا ، حالتي الدينية متوسطة حريصة على صلاة الفجر ، بس للامانة احيانا بقصر في الصلوات التانية ، عندي حالة ياس شديد جدا
وفيه حلم تانى ياماما نجيه
حلمت ان انا قاعدة في قاعة افراح والمفروض ان الفرح ده فرحي (خطوبة ولا زواج مش باين ) المهم واللي جالي في الحلم ان المفروض ان كل ما نحدد ميعاد يتاجل ودا اخر ميعاد ، المهم قاعة على شكل دايرة والترابيزات بتاعة المعازيم بينها فواصل (يعني كل ترابيزة متقفل عليها ) المهم الحواجز دي اتشالت وبقت القاعة كلها ادامي ، ولفت نظري على الباب واحدة ست مش عارفة بنت ولا ست المهم واحدة لابسة فستان فضي بيلمع بطريقة رهيبة وشعرها اسود جدا وطويل رافعة فوق راسها وحطه تاج فضي على دماغها وحطه روج احمر ، المهم وانا قعدة في الكوشةة في وش الباب بالضبط جت اختي وبتوريني الشبكة مكنتش شفتها قبل كده ، قالتلي بصي وبتفتح العلبة تفرجني عليها ، لفت نظري يا ماما الدبلة كانت متوسطة مش تخينة ومش رفيعة وعليها نقوش صغيرة ، قولتلها بس دس هتكون مش حلوة على صوباعي كنتي هاتي الاعرض ، ولسه همد ايدي على الدبلة راحت مكسورة في العلبة سبتها واضايقت وقلت لاختي ايه ده الدبلة اتكسرت حتى الشبكة متتاكدوش منها كده ، اختي قالتلي لا استني انا هتصرف متزعليش وراحت ملبساني الدبلة وقعدت تضغط عليها بطريقة معينة عشان تتلحم ، وفعلا الدبلة اتلحمت بس شكلها اتغير مبقتش دبلة دهب ، بقت زي الخواتم البلاستيك الشفافة ، وعليها خطوط ابيض واصفر بحيث من بعيد محدش عرف هي في فعلا دهب ولا لأ، والدبلة يا ماما بقت عاملة زي الحزام على ايدي (كانها ساعة ليها ابزيم ) ، انا قعدت اقول في سري انا هشتري دبلة تانية يعني هتكلفني كام يعني ، المهم راح خطيبي او جوزي في الحلم مش عارفة مش فاكرة اسمه ايه بالضبط بس هو كان بحرف الالف ايهاب - احمد او اي اسم تاني ، المهم بيقولي مالك قلتله ولا حاجة ، قالي اخيرا حددنا ميعاد دا تالت ميعاد نحدده كل مرة يحصل حاجة ، وكان بيكلمني بصوت واطي وهدوء جدا ، وبعدين فجاة يا ماما لقيت ادامي زهرية شفافة فيها ورد طويل جدا ، ورد شكله غريب ، اللي جالي في الحلم ان الورد بقاله فترة اسبوع او كام يوم ، ورغم كده يا ماما كان طري وناعم كانه لسه جاي وريحته حلوة جدا الوردة يا ماما الواحدة مخلطة احمر في ابيض مش احمر اوي درجة من درجات الاحمر في الابيض ، وساق الوردة ناعمة جدا جدا ومفيهاش شوك وتخينة جدا يا ماما كانها زرع في الغيط (من تخن الساق بتاعة الوردة )، مديت ايدي على ناحية اليمين جبت ورقة سلوفان من اللي بيتلف فيها الورد في المحلات ، ورحت فرداها وعملاها على شكل القرطاس ورحت جايبة الورد من الزهرية وكان الورد فيه ميه نفضته من الميه وخدته وبلفه في الورق ، فخطيبي او جوزي ده قالي بتعملي ايه ، قلتله هي فيه عروسة من غير ورد ، وبما اننا هنخرج نمشي من القاعة محتاجة ورد انتوا مجبتوش الورد الورد اهه وفعلا لفيت الورد وخدته في ايدي وقمت من النوم على كده .
الحلم ده يا ماما شفته ما بين الظهر والعصر على الساعة 2 كده ، يوم الجمعة ، طمنيني بالله عليكي يا ماما دايه حلو ولا وحش ، علما بان اختي مخطوبة وهتتجوز ان شاء الله قريب
