السلام عليكم ورحمة الله وبركاته
ازيك يا ماما نجية ، بصي يا ماما انا نمت كالعادة قبل الفجر وصحيت قبل اذان الفجر ب تلات دقايق ، وكنت معيطة ومهمومة قبل ما انام شفت الاتي :
حلمت حلم طويل جدا كله ان انا بجري وبدور على كنز مستخبي لجدي ابو والدي المتوفي ومش لاقينها ، المهم اخر مشهد في الحلم وانا بدور وتعبت من كتر التدوير ومش لاقية حاجة ، لقيت بابا بيقولي جدك قال في قلب عين النار هتلاقوا الكنز ، قعدت ادور تاني وافتكر لغاية ما في لحظة افتكرت ان عين النار دي ممكن تكون رسمه جريت على سجادة كانت قديمة المفروض حسب الحلم عندنا ، وقعدت اقلب فيها اقلب فيها لغاية ما لقيت في نصها في القلب بالضبط رسمه تشبة عين النار قعدت اضغط بايدي عشان اتاكد ان الورق اللي فيه الكنز هنا لغاية ما اتاكدت رحت قلبا السجادة وفتحت مكان الورق وطلعته الكنز عبارة عن ( ورقتين ورقة مكتوب فيها ان لينا 10 الالاف جنية قيمة بضاعة ، او قيمة مشتروات عند حد ) والورقة التانية (عبارة عن ورقة من مكان زي القسم او وزارة الداخلية هو مكان ليه علاقة بالشرطة بتصدق على الكلام ده ) الورقتين يا ماما لونهم ابيض في حجم ورقة الفلوسكاب وطرف الورقة من فوق عليه شريط ازرق حلو اوي وقمت من النوم وانا ماسكة الورقتين وانا فرحانه بيهم وبابا معايا فرحان وقمت من النوم على كده .
الله يخليكي يا ماما ايه الكنز المستخبي ده ومستخبي في السجادة كمان ههههههههههه بجد قمت من النوم مش فاهمة يارب يكون خير يا ماما يارب وتطمنيني دايما
انا انسة 32 سنة غير متزوجة او مخطوبة ، حالتي النفسية وحشة جدا جدا ، كنت نايمة معيطة ومهمومة ، مقدمة على شغل ومجنيش رد وببدء في اجراءات الدكتوراه بتاعتي حالتي الدينية متوسطة وكالعادة حريصة على صلاة الفجر
