السلام عليكم ورحمة الله وبركاته
ازيك يا ماما نجيه يارب تكونى بأحسن حال
انا انهارده قبل الفجر حلمت حلم من جزئين فى الجزء الاول حلمت انى موجوده فى المحل بتاعنا انا وبابا وماما وفى حد تانى مش عارفاه فأنا كنت مبسوطه وفرحانه اننا نقلنا فى شقه تانيه فى الحلم وبقول للى كان واقف انى مبسوطه عشان سيبت البلد دى ورحنا المنصوره (انا فى الحقيقه قاعده فى بلد جمب المنصوره على طول وبصراحه نفسى اسيبها واقعد فى المنصوره) فهو كان بيقول كنتوا قعدين هنا قريبين من المحل وهنا احسن وماما زي ما تكون كانت عاوزه تفضل برده بس مش مضايقه برده اوووى من نقلنا وبعدين ماما كانت قعده على كرسى وانا واقفه وراها وقمت حضناها من ضهرها وبعدين لقيت اخو احمد قريبى ومراته اللى هى بنت خالتى واخوها وشوية اطفال كده كتير فى سن 5 او 6 سنين ولقيتهم نازلين من عربيتهم وداخلين المحل فأنا قعده ابص على احمد معاهم مش لقيته فقلت فى نفسى اصلهم كتير اكيد العربيه مكفتش وبعدين بنت خالتى سلمت عليا وباستنى وقالتلى انتى اموره اوووى وقعدوا
اما الجزء التانى حلمت انى فى النادى اللى بيشتغل فيه اخويا هو واخت احمد وكنت واقفه مع ابن خالتى ولقيت اخويا خارج من مكتبه ومروح وانا مرحتش معاه فضلت واقفه مع ابن خالتى والمفروض انا كنت عارفه ان احمد جوه فى النادى مش عارفه بيعمل ايه بس مش شفته وبعد شويه لقيت اخت احمد خارجه وهتمشى هى وابن خالتى وبتقولى يلا تعالى معانا احنا هنروح عشان احمد هيتأخر شويه قلتلها لاء انا هروح انا هاخد تاكسى قالتلى لاء تعالى اقعدى معانا شويه وبعدين ابقى روحى فانا كنت مذبذبه شويه فقلتلها طب استنى اما اطلع الحمام اروح اظبط نفسى واجى فى دماغى عشان لو رحت معاها لما احمد يجى يلاقينى متظبطه وحلوه فرحت طلعت مبنى فى النادى بس هو مش موجود فى الحقيقه وانا طالعه كنت لابسه بنطلون خروج وعليه بلوزة بيجامه فكنت مش عاوزه اروح عشان حاسه ان لبسى مش اوووى ومش ماشى على بعضه بس انا كنت حلوه ووشى امور وحاطه كحل فالمهم دخلت الطرقه بتاعة الحمامات وكان فيها احواض كتير ومرايات وكان موجود مواسير كده كتير طويله وبتنزل ميه كأنها دش كده بس كان المحبس مقفول وكان فيه محابس كتير فانا لما دخلت رحت فتحت محبس النور وظبطت نفسى ولقتنى حلوه ولقتنى بقيت لابسه فوق البنطلون وبلوزة البيجامه بدى روز وفستان عندى فى الحقيقه وبعدين قلت منا حلوه اهو ومظبوطه كان ايه اللى طلعنى وقفلت محبس النور وبعدين كنت عاوز اتأكد تانى من الكحل سايح ولا لاء فجيت افتح المحبس تانى اتلخبطت وفتحت محبس المواسير اللى بتنزل ميه فلقيت نزل عليا ميه نضيفه فجريت من تحتها من غير ما اخد بالى لقتنى رحت تحت ماسوره تانيه نزلت برده عليا ميه نضيفه برده رحت جريت بره خالص وقلت هو اكيد الكحل مظبوط لو كان باظ كنت لاحظت ده فى الاول ونزلتلهم وقعدت احكيلهم وصحيت على كده مكنتش لسه رحت معاهم
انا انسه بقالى حوالى 8 شهور احمد قريبى ده مكلمنى وكان عاوز يرتبط بيا ويتقدم رسمى وانا وماما كمان قالتلى اعرفيه كويس الاول عشان انا مكنش ليا ارتباط اوووى بيه الاول المهم خلاص عرفته ووافقت عليه بس هو كان مش عارف ياخد خطوه رسميه وكل شويه يطلعلى بحجه وسيبته اكتر من مره وكان بيقولى ان فيه حاجه بتمنعه وانا بقالى 7 شهور بقرأ البقره والرقيه لانى كنت تعبانه ولسه بحس شويه بتعب بس خفيف مش زى الاول بس انا ساعات ايام بكسل اقرأ ولقيت احمد يا ماما بعد العيد متغير فى كل حاجه فى معاملته ومشاعره وكل حاجه وطبعا التغيير كان للاحسن وحسيت ان ربنا بعد الاذى والاسبوع اللى فات قالى انه هيتقدم رسمى الاسبوع الجاى على ده يعنى وبعدين اتفقت اننا منتكلمش لحد ما يتكلم وبعدين الاقيه كل يوم يرن عليا فكلمته وانا مضايقه وقالى خلاص اوعدك مش هرن تانى وان شاء الله قبل العيد الموضوع هيتم فانا اتضايقت اكتر وحسيت انه بيأخر برده لانه كان قايلى على الاسبوع ده
وعلى فكره يا ماما احمد قاعد فى المنصوره عشان لو ده له علاقه بموضوع نقلنا للمنصوره وكمان ماما مش حابه الموضوع ده اوووى فعلا
ماما انا اسفه والله عارفه انى طولت عليكى سامحينى بس انا تعبانه جدا والله واعصابى بايظه خالص ومش عارفه ايه اخرتها
طمنينى الله يطمنك ويبشرك بالخير
