السلام عليكم ورحمة الله وبركاته
ازيك يا ماما اكملك الاحلام العجيبة الحلمين دول اغرب بقى ، الحلمين بعد صلاة الفجر والاستغفار وقراءة ايه الكرسي قبل النوم .
الحلم الاول :
حلمت انا انا كنت مع عمامي وعماتي في مكان ما في الجيزة كنا في جنينة الحيوانات الاورمان حاجة زي كده وكنا راجعين ، كلهم ركبوا العربيات وماشيين الا انا معملوش حسابي انا اضايقت في نفسي وقلت مش مشكلة هروح لوحدي وفعلا ركبت عماتي ومرات عمي وولادها وعمامي كلهم ركبوا عربية صغيرة 127 لونها ابيض ، وعمتي يادوب لفت وبتاخد طريق الرجوع لقيت عربية ميكروباص زنقت عليها وزي ما هتخبطها ، وهي فرملت انا جريت عديت الشارع وجريت عليها ورحت لقيتها بتبكي وخايفة وقعدت تقولي شفتي يا مروى كسر عليا بعربيته ، قعدت اهديها واطبطب عليها قلتلها عارفة انك مش غلطانة ، المهم سبتهم هيمشوا لقيت عمي الصغير (اقرب اعمامي ليا ) جاي وبيقولي ايه ده هما ركبوا وسابوكي ازاي يا جماعة كده تروح لوحدها دي الساعة داخلة على 11 وعقبال ما هتوصل هتكون واحدة ، قلتله مش مشكلة هوقف مواصلات واركب ولسه بتكلم لقيت نص اتوبيس فاضي والراجل بينادي فسالته قلتله انت رايح فين قعد يقولي اسماء اماكن في الجيزة وبولاق (مع العلم مليش حد في الاماكن دي خالص بس بسمع اسمها )قلتله هتروح ناحية المترو قالي اه مترو محطة البحوث قلتله طيب عمي بيبصلي قلتله مش مشكلة المترو هيوصلني اسرع متقلقش وجيت اركب لقيت نفسي اول واحدة في الصف وورايا ناس كتير مستنياني تركب بعدي ، كل ما اجي ادخل من الباب مش عارفة كانه مش مفتوح اوي واحاول ادخل وانط واخبط مش عارفة عشان ادخل اتكسفت لان الناس مستياني وبتبص عليا رحت مزعقة للسواق وقلتله متفتح الباب بقى عدل راح فاتح الباب فعلا ودخلت بس اللي حصل ومتقوليش عليا مجنونة الاتوبيس اتحول لمركب ماشي في الماية اه والله يا ماما اول ما دخلت الاتوبس اتحول لسفينة نصها متسقف ونصها مفتوح اخرها بالذات مفتوح ومنور يا ماما والسما منورة بنور عجيب جدا قلت هروح اقعد في الحتة اللي في الاخر المنورة دي مني للسما . ولسه هروح اقعد لقيتت الناس دخلت ورايا وبدوء يقعدوا لقيت ادامي عمي الصغير (اللي كان شايل همي عشان اركب ) ، ولقيت عمتي وعمي جاين من اخر السفينة انا استغربت قلتلهم ايه ده انتم جيتم ليه قالولي شايلين همك تروحي لوحدم مش هنسيبك كده حاجة زي كده ، المهم عمي التاني اسمه اشرف وزع على اللي في السفينة ميه واكل ، ولقيته جاي بيديلي شنطة بيضاء صغيرة بلاستيك فبقوله ايه ده قالي دا نصيبك - زادك - اتصبري بيهم حاجة زي كده مش فاكرة بس اللي فهمته ان دا يخصني انا الكيس كان فيه اكل حلويات شيكولاته وبسكويت وكده بس اللي لفت نظري وكان واخد الاهتمام علبه كانز سفن دايت وعليها بالاصفر كلمة فري يعني حر
وخدتها منه وانا مستغربة اه والعلبة كانت بتلمع يا ماما لونها اقرب للفضي من الابيض .
الحلم التاني :
ودا اخر حاجة قمت عليها من النوم ، لقيت نفسي واقفة في مكان زي ما يكون مكتب متوضب انه مكتب بس مفتوح على الشارع او جنينة هو على مكانمفتوح ، المكان ده اصحابة اتنين واحد اسمه مراد والتاني هاني مراد ده قصير وهاني اطول منه بشوية ، سابولي المكتب وراحوا مشوار وانا بنظم فيه وزي ما يكون بحرسه ببص على الحيطة لقيت حاجتين اغرب من بعض يا ماما ، لقيت لوحة بيضاء في حجم الورقة الفلوسكاب او اكبر شويه مكتوب عليها (...لله تعالي ) بلون ازرق غامق حلو اوي يا ماما والخلفية بيضاء الكلمة الاولى مش فاكرها بس هي كانت زي صدقة لله تعالي ، لوجه الله تعالي ، او ذكر الله تعالي ) وتحت الكلمة دي مربع لونه ازرق مطبوع عليه كف ابيض علامة الكف باينة جدا . ، وببص على بقية الحيطة لفت نظري لوحة تانية مكتوب عليها حاجات كتير ، بس العنوان الرئيسي فيها كالاتي
سورة فيها سر من الاسرار العظيمة في الكون وخير وبركة
حفظ سورة يوسف والخير والبركة وفوايدها
العنوان زي كده بس العنوان بيركز على اهمية سورة يوسف اني احفظها واقراها وببص لقيت صاحب المكان جه وانا كنت لابسة تي شيرت ابيض وحاجةاحمرمن تحت قصيرة بس محدش كان شايف هدومي دي كاني كنت محجبة محدش عارف ولا شايف اني لابسة كده .
دول الحلمين اللي شفتهم دول اغرب من بعض بس انا قمت من الحلمم الاخير وانا مبسوطة بموضوع سورة يوسف ده وكنت حاسة براحة عجيبة ، مع العلم اني في الحقيقة بعشق سورة يوسف وبحبها جدا جدا ، ياريت تقوليلي دا ايه
انا انسة 32 سنة غير متزوجة مقدمة على شغل في الجامعة ومتاجل مش عايز يتبت فيه ، حالتي الدينية متوسطة ولكن بكتر من الاستغفار ، حالتي النفسية وحشة ومضايقة من قلة البخت اللي ملزماني في كل حاجة اعملها متمش . الله يباركلك يارب يا ماما قوليلي دا ايه
معلش انا طولت عليكي بالتفاصيل بس حبيت اقولك كل شئ عشان تكوني معايا في كل التفاصيل وتفيدك في التفسير.
