السلام عليكم ورحمة الله وبركاته
ازيك يا ماما نجية ، انا حلمت يا ماما ان خير اللهم اجعله خير ان انا عماله اطلع سلالم وانزل سلالم وانا لابسة لبس غامق مش فاكرة اللون ، وسامعة ناس بتهمهم من ورايا كانهم بيتكلموا عليا او كده . المهم فضلت اطلع وانزل وكان معايا شنطة يد حريمي لونها اسود ، فجاة يا ماما دخلت باب مكان لقيت المكان من جوه كانه قصر او فندق فخم الارض رخااااااام ابيض ناصع والحيطة ونجف كريستال واباليك كريستال واللمبات زي الشمع كده
المهم يا ماما وانا داخلة المكان فجاة لقيت هدومي اتبدلت وانا ماشية لقيت نفسي لابسة بدلة بيضاء من تلات قطع جاكت طويل وتوب وبنطلون البنطلون ابيض سادة عارفة يا ماما الابيض التلجي والتوب كان طويل برضه وكمه تلتين لغاية الكوع فانا بفتح الجاكت اتفرج على التوب في المراية لقيته تلتين مش كت قلت كده ايه ده دا مغطي الكتف لغاية الكوع بحسبه كت ، التوب عليه تطريز وردابيض وقلب الورد هو اللي بالفضي او بكريستال المهم انه بيلمع ، والجاكيت في تطريز مفرغ على هيئة ورد برضه وورق شجر واطراف الياقة مطرزة بفضي او برضه كريستال صغير .
وانا ماشية يا ماما في المكان ده الابواب اللي ادامي بتتقتح وتقع لوحدها والناس اللي بتفتح الباب بتحني وهي بتفتحه والبا كانه بيقع ومفيش جواجز اكتر من باب حصل فيه كده . ، طلعت سلم لقيت نفسي متغطية ابيض في ابيض حتى الجزمة والشنطة لونهم ابيض بس اللي كانت روعة الشنطة كان لونها ابيض مستطيل بالطول وايديها جلد مضفرة على شكل ضفيرة وانا ماسكة الشنطة فرحان بيها وبقول ايه ده حاجتي فين اللي كانت في الشنطة التانيةببص فيها لقيت الحاجة اتنقلت كمان ورقي وبطاقتي مناديل حاجات عادية وانا ماشية يا ماما مرفوعة الراس والناس بتبصلي جامد . بس قمت من النوم وانا مبسوطة جدا .
دا ايه يا ماما طمنيني ، علما باني شفت الحلم ده من الساعة 1 ونص بليل اغاية الساعة 4 ونص قمت على اقامة صلاة الفجر صليت الفجر ، دا اخر جاجة قمت عليها .
علما باني كنت نايمة معيطة ومهمومة جامد جدا وكنت بشتكي لربنا قبل ما عيني تروح في النوم من العياط .
الحلم التاني :
حلمته بعد صلاة الفجر على الساعة 11 الصبح كده ، حلمت ان انا في مستشفى وكاني دكتورة بتعلم الطب وبتعلم ازاي احط الدوا في اكياس ومعايا ناس تانية منهم منى اختي ، واقفين وماسكين حقن بلاستيك واكياس زي اكياس الدوا لما يكون محلول كده وبنعبي الاكياس دي وانا عبيت كيس وخبيته لانوا معجبنيش . وجه واحد يشبه لبابا وواحدة تشبه عمتي بيفتشوا علينا وشافونا بنعبي الدوا ازاي والست دي قالتلي متعبيش اكياس الدوا للاخر زي ادوية السرطان ادوية السرطان هي بس اللي بتتتعبى للاخر وفعلا قعدت اعبي دوا صح بعد كده والكيس الغلط جنبي برضه ، وبعدين الراجل اللي في الحلم قال للست دي قالها عادي احنا بناخد 9 سنين عشان نتعلم كل ده صح
وقمت من النوم على كده .
دا ايه يا ماما علما باني 32 سنة انسة ، حالتي النفسية وحشة جدا جدا ، حالتي الدينية وسط بس بحافظ على صلاة الفجر ، مقدمة في وظيفة اني ادرس في الجامعة في مكانين ومجانيش رد منهم . طمنيني بالله عليكي لاني ياسة اووووووووووووي .
