السلام عليكم ورحمة الله وبركاته
ازيك يا ماما يارب تكوني بخير ، بصي يا ماما انا حلمت حلمين اغرب من بعض صغيرين :
الحلم الاول :
اني واقفة في مكان فيه قضبان مترو زي مترو مصر الجديدة والجامعة كده ، وانا نزلت من عربية وعشان اعدي اروح المكان اللي انا عيزاه لازم اعدي ست شرايط مترو ورا بعض . كل شريط منهم واحد رايحوواحد جاي ، انا بقيت كل ما اعدي شريط اقول لنفسي بصي لحسن يكون المترو جاي يخبطك ، ابص قبل ما اعدي الاقي المترو فعلا يا جاي من بعيد ، يا لسه معدي قبل ما اعدي انا ، كل شريط مترو من الستة اقف واقول نفس العبارة ونفس المنظر يتكرر المترو يا عدي عن بعد ، يا هيجي عن بعد لسه .
الحلم التاني :
ان انا في المستشفى وحواليا ناس كتير معظمهم رجالة وواقفة ابص على غرفة فيها ستات متجمعة الغرفة دي فيها بابين باب ادام وباب ورا ، انا واقفة على الباب اللي ورا ولقيت مكان فاضي فقلت الله اخيرا ممكن اقعد جيت ادخل اقعد لقيت المكان ده عبارة عن زي ترولي وفي ستات قعدة وجنبهم مكان فاضي وسرير المرضى فاضي ، لسه هدخل لقيتهم جايبين واحدة مريضة على نقالة وبيحطوها على السرير ، مش شايفة مرمحها بس الست دي نصها التحتاني متغطي والنص اللي فوق عند بطنها مكشوف واول مدخلت الاوضه الستات قعدت تصوت تصوت والست دي مليانة تخينة يعني انا خفت ومبقتش فاهمة ايه اللي بيحصل بس اللي فهمته من كلام دكتور او ممرض دخل يزعق في الستات دي انها عاملة عملية في البطن - الكبد - الحوض حاجة زي كده ودا اللي مخليها تخينة او وارمة بالشكل ده وانهم يبطلوا صويت .
انا مشيت وسبتهم بس رحت اقعد في مكان تاني وقعدت فعلا بس جيت اقوم لقيت حاجة غريبة لقيت زي البامرز بتاع الاطفال تحتي بس على كبير مغطيني من تحتي كليه ، لقيت على اطرافه بس من فوق دم احمر استغربت اوي وقعدت اقول دا مش دمي . ، وقمت قعدت الم فيه واشيله عشان ميضيقش حد وفعلا لميته ورميته . وقمت من النوم .
دا ايه يا ماما نجية انا مش فاهمة حاجة وخايفة جدا ، الحلمين دول حلمتهم من الساعة 1 ونص بالليل لغاية الساعة 4 ونص الفجر عشان اصلي الفجر . طمنيني وقوليلي ايه الكلام ده معناه ايه .
انا انسة 32 سنة غير متزوجة ، حالتي النفسية وحشة جدا وحالتي الدينية متوسطة ، كان في موضوعين ارتباط وفشلوا في اسبوع واحد ومقدمة في شغل ومجاليش اي ردود من اي مكان قدمت فيه والاتنين في التعليم للكبار وحاسة بياس رهيب جدا .
طمنيني الله يخليكي
