الحلم رقم 3
انا منفصله واتقدملي عريس وصليت استخاره علي الموافقه وفعلا وافقت وجه زارنا في البيت مرتين مره لوحده ومره هو واهله وبعدين صليت استخاره تاني بس علي الرفض
حلمت ان هو واهله هيجوا يزورونا تاني وانا كنت برتب البيت وبجهز للزياره وفجاه جه هو واهله قبل ميعادهم وانا مكنتش لسه لبست ولا جهزت نفسي فدخلت غرفه وقفلت علي نفسي بس ملقتش الهدوم والحاجات الي انا كنت محضراها علشان اقابلهم بيها ... فكرت البس اسدال واطلع اسلم عليهم وبعدين اروح ادور علي هدومي والبس بس وانا بفتح الباب لقيت اخته وولادها الصغيرين بيتجولوا في البيت عندنا ... دخلت الغرفه تاني بس لقيت اخويا قاعد فيها قلتله انا هكتب في ورقه اسماء الهدوم والحاجات بتاعتي علشان يطلع يدورلي عليها ويجيبهالي البسها.
وحلمت ان انا ووالدي في مكان واسع زي ميكون بنك وحطيت كارت سحب الفلوس في ماكينه السحب وفجأة صفارات انذار اشتغلت في المكان كله ولقيت الناس كلها بتبص عليا فقعدت علي الارض اعيط بس بدون صوت.
بعدين انتقل المشهد في الحلم لغرفه والدي في بيتنا وكان والدي جايب واحد فك السرير الكبير وخرجه من الغرفه ولما سالته قالي انه هيجيب سريرين صغيرين واحد لنفسه وواحد لوالدتي وفعلا واحد دخل الغرفه ونصب سرير جديد صغير وصحيت من النوم قبل ما الواحد ده يدخل ينصب السرير التاني.
