الحلم رقم (3)
حلمت ان انا كنت فى المدرسة وكنت فى الصف الثانى بس مش فاكرة اعدادى ولا ثانوى
وكانت مدرسة مشتركة المهم بشرونا بالنجاح والانتقال للصف الثالث واحنا كنا مبسوطين
وطلعنا نشوف الفصل اللى هندرس فيه فى سنة تالتة طلعنا الدور التالت لقينا الفصل اللى هندرس فيه
لقينا الفصل مقسم لقسمين قسم داخل الفصل وقسم خارج الفصل وقالوا لنا اننا هندرس فى الجزء اللى خارج الفصل
فأنا قلت ازاى ندرس برة الفصل فى الشمس فقالوا لو حسيتوا بالحر ساعتها ادخلوا جوه الفصل استغربنا بس قلنا ماشى وكان شكل الفصل جميل والجزء اللى خارج الفصل كان واسع وشكله مريح
وبعدين قالوا لنا ان فى امتحان ودخلونا الفصل علشان يعرفونا ارقام الجلوس واللجنة بتاعتنا بدأوا ينادوا على أسماء الطلاب
وانا اتفاجئت ان انا مع شخص صديقى فى اللجنة معايا كنت مبسوطة اول ما عرفت كده
قلت فى نفسى اروح اشوف مكان المقعد بتاعى قبل ما هو يروح قبلى واول ما روحت اللجنة بتاعتى لقيته قاعد فى مكانه قبلى
استغربت شوية لانى كنت فاكرة انه هيدخل اللجنة متأخر لكن هو دخل بدرى ومكنش فى حد كتير فى اللجنة لان الامتحان كان لسه مبدأش فأنا دخلت اللجنة وقعدت ادور على مكان مقعدى ولقيت مقعدى قدام مقعده بالظبط وكان معايا شنطتين بتوعى واحدة بتاعت
المرحلة الاعدادية والتانية بتاعت المرحلة الثانوية حطيت واحدة على الارض والتانية على المقعد جنبى
فهو اتريق عليا قالى جايبة شنطتين معاكى واحنا فى امتحان بس انا معبرتهوش لانى كنت حاسة بوجع فى قلبى لاننا كنا متخاصمين
لكن كنا بنتعامل مع بعض معاملة خفيفة وكنا بنبتسم لبعض وبعدين قعدت اظبط المقعد والدرج بتوعى
وسعت لصديقى شوية لانه كان قاعد فى المقعد الاخير وانا كنت خايفة يكون قاعد مزنوق فى الدرج فوسعت له من عندى شوية ووسعت
للطالب اللى كان قدامى شوية وبعدين قعدت فى مكانى لكن كنت
ببص على صديقى من غير ما ياخد باله وكان نفسى نتصالح لكن كنت مستنياها تيجى منه لانى مش عارفة هو نفسه يصالحنى ولا مش فارق معاه
وبعدين قعدت اجهز للامتحان طلعت القلم والمسطرة وباقى الادوات لكن وانا بطلعهم كنت بدارى الشنطة عنه لان هو قاعد ورايا
وممكن يشوف الحاجات اللى فى شنطتى وانا مكنتش حابة كده فكنت بدارى الشنطة رغم انها مفيهاش حاجة
وبعدين قعدنا مستنيين ورق الامتحان يوصل لكن اتأخر شوية مش عارفة ليه وبعدين الاولاد اللى كانوا معايا فى اللجنة قالوا عليا ان انا
البنت الوحيدة اللى فى اللجنة فأنا قلت لهم لا فى بنات تانى بس قليلين كان عددهم تلاتة وانا الرابعة وباقى اللجنة كلها اولاد وبعدين الطالب اللى قدامى قعد
يرخم عليا ويحاول يلمسنى فأنا بصيت لصديقى اللى ورايا فقال لى هو بيعملك ايه
بس انا مقولتلهوش والطالب كان عمال يلمس فى ضهرى وانا كنت بمنعه
انا آنسة وحالتى الدينية متوسطة
صديقى عازب وفى الحقيقة هو كان صديقى واتخاصمنا وسيبنا بعض من فترة كبيرة
الطالب اللى كان قدامى معرفوش