تفسير احلا م يوم السبت الموافق 10\31ان شاء الله

السلام عليكم ورحمة الله وبركاته
رأيت خيرا اني انا وامي راكبين مع واحدة صحبتها العربية (العربية بتاعة صديقة امي) واسمها فدوي وانا كنت قاعدة قدام جنبها وماما قاعدة ورا وانا اللي قاعدة احكي معاها وبعدين هي وصلتنا للمدرسة اللي ماما بتشتغل فيها (في الحقيقة ماما علي المعاش بس زمان كانت بتشتغل مدرسة) ولما رحنا المدرسة ماما كانت هتاخد جهاز تكييف نوعه حديث من المدرسة وان دا امر قانونى وفعلا ذهبنا لنأخذه وظهرت واحدة ست معرفهاش لابسة هدوم ملونة وتصرفاتها انتهازية وقررت تاخد من ماما جهاز التكييف وماما قالتلي بعد ما عملنا الورق هي هتاخده فانا قلتلها مش هيحصل وقلت للست التكييف بتاعنا وملكيش دعوة بيه واخدته ووضعته في شنطة العربية بتاعة طنت فدوي عشان توصلنا بيتنا....
 البيانات:
صديقة ماما اسمها فدوى وعندها ولدين وبنت 
ماما علي المعاش 
انا عندي ولدين وحامل
لي اخت عندها مشاكل مع جوزها وانا وماما اللي بنحاول نساندها .....

3
سلام عليكم 
انا دايما احلم بالكعبة يا ماما نجية وبشكل اسبوعى
كان فيه ذنب بعمله وتبت عنه وبعد ما تبت حلمت إنى زرت الكعبة وكنت ببكى من الفرحة وكانت اختى الكبيرة المخطوبة معايا وكنا بنطوف حوالين الكعبة وكان المطر بيمطر بس مش كتير وكنت لابسة عباءة بيضاء وكنت بشعرى ( مع العلم انا منتقبة )وبدور على حجاب لقيت طرحة بيضاء لبستها وأذّن أذان العصر وصليته هناك ومكنتش مصدقة ان ربنا كتبلى زيارة بيته
وتانى مرة حلمت ان الفرق ما بينى وبين البيت الحرام حوالى تلاتة متر وكان فيه حاجز حبل بين البيت الحرام وعديته وكان المطر بيمطر برضوا وانا كنت ببكى من فرحتى وأذّن أذان المغرب وصليته برضوا هناك ( مع العلم انى لما كنت بصلى فى الحلم كنت بصلى فى ساحة مسجد كبير بس كنت معتقدة كأنه الحرم ) 
تالت مرة شفت الكعبة كان انهاردة
حلمت إنى ساجدة قدام الكعبة بصلى وخايفة ان حجارة الكعبة تقع عليا وبالفعل وقع عليا حجرين تلاتة بس لما وقعوا عليا مكنوش حجارة
الحجارة كانت مكسية بكسوة الكعبة وكانت عاملة زى عجينة الخبز  فى ملمسها دا كان تشبيهى ليها فى المنام , متأذتش منها خالص
وكنت خايفة اصلى فى نفس المكان ويقع حجارة تانى فصليت فى مكان تانى  وبرضوا المطر كان بيمطر 
مشترك دائما فى رؤيتى للكعبة المطر والبكاء من الفرحة والأذان والصلاة
انا امبارح كنت نايمة زعلانة ومضايقة من خبر وحش سمعته 
انا طالبة جامعية وانسه والحمدلله رب العالمين بحاول قدر الإمكان اقرب من ربنا اكتر
وامل حياتى ان ربنا يكتبلى زيارة بيته لان دى اكتر حاجة بتمناها بس والله دلوقت مش بفكر فى زيارتى ليها كتير بسبب انشغالى بدراستى