السلام عليكم ورحمة الله وبركاته
ازيك يا ماما نجيه اخبارك ايه يارب تكونى بخير
انا حلمتاول امبارح حلم طويل شويه وفيه اكتر من مشهد معلش هتعبك معايا بس انا قلقانه منه اووووى
انا شفت خير انى انا كنت فى الشارع ولقيت اودام محل واحد قريبى(انا بتمنى الارتباط بقريبى ده بس للاسف بقالنا مده وهو مش قادر ياخد خطوه ودايما يقولى انه حاسس بحاجه بتمنعه) جنيه فضه وربع جنيه كمان فضه وطيت واخدتهم وبعدين لقيت نفسى بعد كده فى بيتنا القديم ولقيت قريبى برده موجودولقيت شعرى ناعم وجميل اوووى وكنت سيباه على كتفى فلقيت حبه من شعرى اللى على كتفى اليمين وقعوا فانا قلت خلاص انا هبقى اقص الجهه التانيه عشان تبقى متساويه هو اصلا كده طوله برده حلو وشكله حلو وبعدين لقيتنى فى بيتنا الحالى وكنت انا وماما واخويا وابن خالتى فاخويا بيحكيلى عن اخو قريبى اللى قلتلك عنه انه عطى لواحد تقريبا زي تذكره لمكان اخويا كان عاوز يروحه بس اخويا برده كان هيروح من غير ما ياخد منه فقلتله ده ابيه محمد ده طلع قليل الاصل يعنى عشان اداها للغريب واخويا لاء فابن خالتى زعل انى قلت عليه كده لانه جوز اخته ونزل وقف تحت فى الشارع فى محل قصادنا فرحت البلكونه ابص عليه وعشان اقوله انا جايلى عريس فلقيت الحته بتمطر جامد فلميت الهدوم وبعدين بطلت فببص للارض لقيتها اتبلت اوووى فقلت ده انا مش هعرف اخرج اشوف العريس كده ده شكله نحس ولقيت ماما ورايا بتقول يعنى بعد المطر ده خير لرانيا اللى هى انا
ولقتنى ماشيه فى الشارع وقابلت واحده اعرفها بتقولى انتى هتشوفى العريس كده قلتلها لاء انا هروح اغير هدومى وكنت حاطه مانيكير احمر وبعدين سيبتها ومشيت ولقيت واحد واقف فى الشارع المفروض هو العريس ومعاه بنتين وواحده ست فانا مردتش اقف لما لقيت البنات حواليه كدهومشيت فقام سايبهم وجايلى ولقتنى لابسه جيبه ولوزه حلوين اووووى ولونهم اخضر وكنت مبسوطه بيه اووووى ولقيت بنت خالتى ماشيه اودامى ولما شافتنا بصتلى بصه معناها مين ده وابتسمتلى
صحيت ونمت شفت حاجه غريبه رعبانى اووووووى شفت انى فى مطبخ شقه عندنا فى البيت بس محدش قاعد فيها وكان موجود ناس كتير فى المطبخ فلقيت بلاعة المطبخ مش عليها غطا ومحطوط فيها لكلوك اللى بيتلبش فى الرجل ده فسألت عن الغطا عشان كنت خايفه يطلع فيران او صراصير والكلوك مش قافلها كويس ففجأه طلع منها واحد شكله وحش واسمر وشعره ابيض ومش موجود غير نص جسمه اللى فوق بس والقدمين لكن معندوش رجلين فساب الناس كلها ولقيته بيجرى ورايا فنزلت جري ولقيت ماما فى شقتنا اللى احنا قعدين فيها فتحت عليها وقلتلها وقفلت على طول لما لقيته نازل ونزلت جري وفتحت بوابة البيت وقفلتها ورايا وخرجت اجرى فى الشارع ورحت جاريه مستخبيه فى شارع جانبى عشان ميشوفنيش بس معرفش اذا خرج ولا لاء
ماما نجيه طمنينى ربنا يطمن قلبك يااااااااااااااارب
انا انسه وفعلا فيه عريس اليومين دوول بس لسه مشفتوش وبصراحه مش عاوزه اشوفه وانا بتمنى الارتباط من قريبى بس مش عارفه ايه اللى بيمنعه بيقولى انه حاسس ان حاجه مش مفهومه بتوقفه
انا كنت من كام شهر بدأت احس بتعب وصداع دايما واشوف كوابيس وكنت بدأت اقرأ البقره والرقيه وكنت ساعات لما احس انى بقيت كويسه اكسل شويه بس رجعت اواظب تانى
على فكره يا ماما انتى كنت قلتيلى فى الرؤيه اللى فاتت ان حد هيجبلى عريس ومش هيحصل نصيب وهرجع لقريبى وده فعلا حصل ان حد معرفه اللى جايب العريس
