الحلم رقم ٦
السلام عليكم ورحمه الله وبركاته
ازيك يا ماما نجيه يارب تكونى بألف خير وسعاده يااااااااارب
انا حلمت انى واقفه بشترى حاجات فى السوق وقابلت واحده صاحبتى كانت رايحه تحضر فرح فى قاعه قريبه من السوق وانا واقفه معاها لاقيت العريس والعروسه داخلين ببص عليهم لاقيت العريس يبقى اخويا واستغربت اوى ازاى ده فرح اخويا وانا معرفش ولا حتى اعرف مين العروسه رغم ان اخويا بيحبنى جداااااااااا
المهم دخلت القاعه لاقيتها ضيقه اوى وصغيرة وفيها كراسى قليله واضايقت من شكل القاعه ولاقيت ناس اعرفهم معزومين تبع العروسه وسلمت عليهم وكانوا زعلانين منى انى مش عزمتهم
بعدها اتصلت ببابا علشان افهم ايه اللى بيحصل وكلمته لاقيته بيقولى هاتى شنطه السمين اللى فى الصالون قولتله يا بابا انا مش فى البيت
انت ليه مش موجود فى فرح محمد قالى محمد مين قولتله اخويا ( مع ان العريس كان اخويا مهاب الصغير مش اخويا محمد )
بابا قالى اه صحيح نسيت
قفلت مع بابا وقولت معلش ادخل القاعه بقى اكلم اخويا واباركله دخلت اضحك واهزر واقول للناس عايزة اشوف العروسه علشان لو مش حلوة مفيش فرح
ودخلت للعروسه لاقيتها مكشره ومش بتضحك بس سلمت عليا عادى واخويا كان قاعد مكسور وساكت وكلامه قليل اوى ومش بيضحك
شويه وماما قالت لمهاب اخويا احنا هنحجزلك اوضه هنا تبع القاعه قالها طيب احجزى اوضه بحمام مشترك علشان تبقى ارخص يعنى وانا قولتله لا يا حبيبى علشان عروستك هتتكسف
العروسه بقى سمعت ولاقيتها وقفت على الكرسى وتزعق وتعلى صوتها على اخويا وتقوله لا مش هقعد فيها
انا اضايقت اوى من طريقتها وصوتها العالى وقولتلها واطى صوتك انتى ازاى بتكلميه كده
وأمها هى كمان اتكلمت بطريقه وحشه واخويا ساكت ومكسور وانا اضايقت اوى من كسرته دى مبقتش مصدقه ان ده اخويا
وشويه واخويا قال لأم العروسه انتم عاملين مشكله ليه تروح عروسه تيجى غيرها بس اللى هدير تقوله يتعمل واللى عيزاه يتنفذ (هدير دى انا يعنى)
لما قال كده انا اتبسط وحطيت ايدى على كتفه وقولتله تعالى عايزة اكلمك وكنت ناويه اقوله سيب العروسه دى وفيه ألف غيرها كنت حاسه انه شايف علشان اتسجن يبقى خلاص محدش هيقبل غير دى ومكسور قدامها لكن صحيت من النوم قبل ما اقوله الكلام ده
اخويا عمل حادثه فى فرح واتسجن وبقاله سنه فى السجن ومحكوم عليه ب٣ سنين
