تفسير احلام يوم الاحد الموافق 7\26 ان شاء الله

حلم رقم3

ام وائل كتب:

السلام عليكم ماما نجيه
الحلم دا لصاحبتي ياريت تفسريهولها يارب يجازيكى خير وهى هتكتبه لحضرتك

حلمت انى رأيت امى المتوفيه بتكلم ابى عنى وعن خطيبى السابق كأنها عايزه تصلح الموضوع وبابا رافض عشان كانه عايز لى الخير او كدا بس ماما قالت له وكانت متنرفزه وبتتكلم بجد اوى انا اتفقت معاه على كل حاجه وهو قالى انه هيعمل كل اللى يرضيها تقصدنى انا وخطيبى وبعدين انا كنت جايه عندهم وهم بيتكلموا ولاقيت خطيبى او كأنى تخيلته فى حجره ابى وامى وهم كانوا فى الصاله وبعدين كان زعلان او متضايق تقريبا من كلام امى كانها لامته او حاجه فكان زعلان او انا تخيلته كدا فى الحلم وبعدين بابا مبقاش موجود وامى بتعرفنى ان موضوع الخطوبه انصلح تانى بس بشرط انى اروح الكوافير لوحدى وميكنش معى احدوهى بتكلمنى انا جلست فى الارض وكان فى كرتونه مليئه بالاحذيه وانا جلست عليها فقلتلها ازاى معرفش قالتلى هو دا الشرط فانا تخيلت نفسى لما اروح الكوافير هرتدى الفستان ازاى لوحدى وكان ملون بس مش فاكره لونه بس تقريبا كان من درجات الفوشيا وقلت لنفسى اه دا بقى اول تحملى للمسؤليه لوحدى وكنت عادى ومخفتش ولا قلقت  وبعدين لاقيت ماما واقفه فى الصاله وكنت انا واختى الوسطانيه جالسين على الارض واختى الكبيره كانها بتحضر اكل للفرح تقريبا كانت بتنقى ارز وماما كانت واقفه وماسكه تورتايه متوسطه بس اربع ادوار وكانت ابيض فى روز وانا قلت تانى نفس التورتايه لرابع مره نفس الشكل والالوان وبعدين امى كانت ماسكاها فتعوجت منها الادوار من غير ما تاخد بالها وانا واختى الوسطانيه فضلنا نضحك اوى بس بندارى فى ضحكتنا عشان ماما ماتزعل عشان تقريبا كانت بتشكوا من نظرها فى الحلم واختى الكبيره كانت بتضحك برضه بس قليل يعنى مش كانت راضيه انها تضحك على ماما بس ماما جاءت تحط التورته على الكومودينو حطتها بالمقلوب خالص الدور الاصغر بقى تحت وكدا واتلخبطت فى بعض وبعدين انا مزعلتش وقلت اختى الكبيره هتعملى واحده تانى غيرها
يارب يكون خير يارب

nodyyyحبيبتى اولا تلك العريس كان كويس وامك بتشهد بذلك بس امره انتهى وممكن يرجع تانى وهترحبوا به وهتضعوا شروتكم لكن ا هتتلخبط وهتبوز الزيجة وكل شئ نصيب كتب:

حلم رفم 2
السلام عليكم يا ماما الاول سامحيني عشان الخط الصغير لإني بعتاه من الموبايل ومفيش تكبير خط
الحلم هو "حلمت إن انا وصحبتي إحنا رايحين الجامعه ونزلنا من اتوبيس في ارض زراعيه وكان فيه طريقين واحد يمين وواحد شمال مشينا ف اليمين . صحبتي قالتلي الطريق ده اسرع من التاني . والارض كانت مزروعه دوم وحاجه تانيه فيها شوك كان شكلها حلو جداا . بس احنا ماشين جنبها مش فوقيها وطلعنا بره ع الطريق كان في واحد واقف بعربيه مليانه خس كابوتشه المدور ده وشكله تحفه ولونه اصفر واوراقه صغيره خالص زي قلب الخس من جوه وكله طول واحد وقعد ينقي لصحبتي وانا كنت بنقي لنفسي الاصفر عشان يبقى لسه جديد ومسكر "
إنتهى الحلم
حالتنا إحنا لسه متخرجين الحمد لله وآنسات

سبحان الله وبحمده246 كتب:

حلم رقم3

تاني يوم وفاه لحماتي بنت اختها حلمت ان خلتها المتوفا اعده علي سرير وهيه مريضه وادتلها ورقه بتقول كئنها رساله بنت اختها (اللي حلمت ) بتقول لحماتي اندهلك حد من اخواتك هزتلها رسها يعني لاء طب ولادك برضه هزت رسها انه لا واخدت الورقه البت اللي حلمت وصحيت مش عارفه تديها لمين

فخر لينا محمد نبينا كتب:

رقم (4)

فى عريس متقدملى وانا مش مستريحه اوى قلقانه شويه

دعيت ربنا امبارح قبل ما انام وحلمت قبل الفجر

ان العريس ده اللى هو كان ساكن جمبنا فى المنطقة القديمه قبل ما نعزل وده سبب مقلقنى انى مش حابه عريسي يبقى من هناك

المهم حلمت انه هو فى هيئه شاب تانى كان جارنا هناك برضوا بس كان اصغر منى وكان اسمه اسلام وتوفى شهيد بإذن الله من حوالى 3 سنين كده

فحلمت ان العريس ده هو إسلام جارنا المتوفى ده وهو فى الحقيقه طبعا واحد تانى اللى هو جارنا فى المنطقه اللى متقدملى ده وهو اكبر منى واسمه سيد

فهو فى الحلم كان فى شكل واسم إسلام ده الله يرحمه وكنت بتكلم معاه وبقوله يملينى رقم تليفون البيت بتاعهم 

فمكنش عارف يمليهولى صح وانا مليته رقم بيتنا احنا عشان يعرف بيتملى الرقم ازاى وكان هو حافظ رقم بيتنا وبيقوله قبلى 

وبعدين فى دماغى بقول هو مش عارف يملينى رقم بيتهم هو مات قبل ما يخترعوا التليفونات !!

علما انى متضايقه يا ماما نجيه زى ما بقولك عشان العريس اللى متقدم ده من منتطقتنا القديمة دى وانا مبحبهاش وشايفه ان الشباب اللى فيها اى كلام

وإسلام الشهيد ده الله يرحمه كان ابن حلال اوى ومحترم وطيب وانا بعزه فهو جالى فى صورته !!!!!

،، وبعدين بعد ما خلصت كلام معاه ودخلت بيتنا قعدت ألبس لبس العروسة بتاعى التيشيرتات والشورتات وقمصان النوم وكنت شايفه نفسى فى المرايه وكان شكلى حلووووو اوى وكنت فرحانه ان جسمى جميل وشكله حلو عشان لما نتجوز بقه ولبست كذا طقم وكانوا حلوين عليا "

بس كده ،، انا لسه مقعدتش اتكلم مع عريسى سيد ده بس انا قلقانه عشان كده دعيت ربنا من قبل ما نقعد نتكلم حتى 

وبابا حلم بجدى والده نايم على الأرض وبابا إداه مخده حطها تحت راسه ونام عليها ،، معلش ماما نجية بنتعبك 

متشكره جدااااا :))))

toto كتب:

الحلم رقم (5)

حلمت ان احنا كنا عاملين حضرة لاهل الله لكن مكنش فيها طبل وموسيقى كنا حاطين كراسى وموائد فى الشارع وكان فى ناس قليلة رجال وستات

وانا واخواتى البنات كنا قاعدين بنبص من الشباك على الناس اللى فى الشارع وكنا فاتحين الشباك خالص وجاء كام طفل اولاد صغيرين بصوا علينا واحنا فى الشباك قعدوا يرخموا علينا ويقولوا لنا انتوا قاعدين ساكتين وواحد منهم قعد يغنى كلام دينى زى اللى بيتقال فى الحضرة وكان صوته حلو قولتله انت صوتك حلو وينفع لما تكبر تشتغل فى المهنة دى وبعدين قفلت زجاج الشباك علشان محدش يزعجنا

وبعد كده انا دخلت قعدت على المائدة فى الصالة كان فى اكتر من مائدة لكن كنا لسه محطيناش الاكل  والناس كانت قاعدة على الموائد ومنتظرة وانا قعدت على مائدة لقيت بنات كانوا معايا فى الابتدائى كل واحدة كان معاها خاتم 

وكانوا بيبدلوا الخواتم مع بعض وبيتكلموا عن الخواتم بتاعتهم وجات واحدة مسيحية كانت معايا فى الابتدائى قعدت معانا على نفس المائدة والبنات اللى كان معاهم خواتم كلموا البنت المسيحية قالولها انتى مش معاكى خاتم هى قالتلهم مش مهم 

وهما حسسوها بالاحراج وبعدين الناس كلها قعدوا على الموائد وحطينا الاكل كان لحمة مطبوخة بالصلصة وانا قعدت ادور على مائدة اقعد عليها لكن ملقيتش مكان اقعد فيه كل الكراسى اللى باقية كانت جنب رجالة وانا مكنتش حابة اقعد جنب اى  راجل حتى اخويا

المهم انا قررت انى مش هأكل معاهم وانسحبت من غير ما حد يشوفنى وكنت لابسة فستان مكنتش مرتاحة فيه اوى لانه كان ضيق على الاكتاف مكنتش عارفة اتحرك براحتى وكان ضيق شوية عند الصدر فأنا خدت نفسى 

وطلعت الدور التانى لكن وانا طالعة على السلم اخويا شافنى وقال للناس كلها ان انا سيبتهم ومشيت وقعد يضحك عليا والناس كلها ضحكوا معاه وانا زعلت من اخويا لانه قال للناس انى مش هأكل معاهم 

فى الحقيقة

والدتى عملت عقيقة بسيطة ذبحت فراخ ووزعته هى عاملة العقيقة للعيلة يعنى مش لحد مخصوص فينا هى لينا كلنا

انا آنسة وحالتى الدينية متوسطة

اخواتى آنسات

اخويا عازب

sa_ra كتب:

حلم 6
ماما انا حلمت ان بنت خالتي جايه تقولنا ان متقدملها عريس وهي كانت مبسوطه اوي و فرحانه و احنا كنا متضيقين جدا لانه مش مناسب و قعدنا نتريق عليها و نقلها هتتجوزي ممرض انت هابله ده مينفعش بس

بنت خالتي متوسطه التدين 23 سنه انسه

ام وائل كتب:

السلام عليكم امي الغاليه
انا حلمت خير ان شاء الله اني كنت فى مكان واسع زى المنزل بس كبير اووى وغرف واسعه كله حصر وفرش وكان مخصص للصلاه زى مايكون مسجد فى مكان ريفى انا رحت اصلى لاقيت فى خجره خلفيه بنات بتنده على لاقتهم اقاربي واصحابى من البلد انا شاورت لهم وقلت هسلم عليهم بعد الصلاه وبعدين كأن الصلاه بدأت عند الرجال واخنا مش سامعين ففى بنات علت صوتها بالتكبير او الفاتحه يعنى بس صوت المايكروفون على وكان مسابق البنات فقلنا كدا هنتلخبط المهم لاقينا برا المسجد هيصه واصوات عاليه وكدا اتاري الجيش جاء ولغى الصلاه المقامه عشان يعمل مسابقه للناس اسئله واجوبه وجوايز وحفله وكدا وحطوا الترابزات وعليها المفارش وكل شئ بسرعه والناس كتير جريت عليهم عشان المسابقه دى انا فضلت مستغربه واقول لا اله الا لله يلغو الصلاه عشان يعملو مسابقه هما مين دول وايه دا اللى بيعملوه
ورحت اصلى مابقتش عارفه قلت يارتني كنت صليت ورا مع اقاربي البنات واصحابى وناويت الصلاه بس قلت لا لازم اتخانق معاهم الاول ازاى يعملو كدا دا حرام ورحت لاقيت ظابط من الجيش قلتله لو سمحت مش حضرتك ظابط فى الجيش قالي انا مابحبش حد يقولى كدا انا بردوا صممت اكمل كلامى وقلتله ازاى تلغوا الصلاه عشان تعملو مسابقه ينفع دا دا حرام كدا فجأه الظابط دا بقى ظابطه ست يعنى ومسكت ايدى وضحكت وقالت لى اااه انتى بقى اللى لما بتشوفى حاجه غلط بتفضلى تتكلمى عنها على الفيس قلتلها وانا بضحك اه بس مش كل اللى بتكلمو معاكى بيبقوا انا انا اسمى كذا على الفيس خدى بالك من اسمى مش هتلاقينى انا اللى بتكلم معاكى فى كل حاجه بس انا بتكلم مع ناس كتير يعنى علي الحاجات دى مش انتى بس وكنا بنضحك وهى ماسكه ايدى وبتشدنى وراها بس كنت قلقانه مع ان الحوار كان بضحك وكمدى بس كنت قلقانه منها نها تأذينى يعنى وخلص الحلم على كدا يارب يكون خير
معلش ماما نجيه انا باعته حلم فى الرسايل وبقاله كتيير ياريت لو مش هتعب حضرتك تفسريهولي بالله عليكى وتطمنينى وربنا يجازيكى خير يارب لحسن قلقانه منه اووى

ندى العمر 5 كتب:

الحلم رقم 8
 
 
ماما حلمت ان انا وهى ماشيين مع بعض وشفنا محل ورد فيه ورود جميلة جدا
فاشتريت وردتين وردة ليا ووردة لماما بس قلت لماما شميها وهاتيها فشمتها وادتهانى تانى
 
سؤال بعد اذن حضرتك كان ماما حلمت قبل كده ان واحدة صاحبتها جابتلها هدية فحضرتك فسرتهولى انها هتجبلنا عريس
دلوقتى اتقدملى شخص من ناحية ناس تانية خالص هل كده الموضوع ده مش هيكمل عشان الرؤية بتقول عكس كده
خصوصا ان موقفة كل تفكيرى على شريك حياتى انه جاى من ناحية ماما لان قبل كده بردو شفت ان ماما لبستنى سلسلة فقلت يبقى هياجى عريس من ناحيتها ومن ساعتها وانا مش بفرح باى عريس يتقدملى لانه بيكون عكس اللى منتظراه ومش بياجى من ناحية ناس ماما تعرفهم؟؟؟

بسمه رضى كتب:

حلم رقم 9

حلمت خير اللهم اجعله خير اني في شقت ماما وفي اوضه اخويا بس الاوضه كبيره اوي وفيها مقاعد دراسه وقعده فيها في الصف الأول و جنبي صديقه ليا من أيأم الطفوله وفي محاضره شغاله وبنسمع المحاضرة  وكانت فيه مسأله مش عارفه حلها واخدت  كراسه صحبتي عشان انقل الحل الصحيح ليها وفتحت الكراسه لقيت صفحات كتير فاضيه بس لقيت الحل انا مش فكرة نقلته ولا لا بس وسمعت أذان بي صلاة  ايه مش عارفة  واتوضيت وصليت بس المشكله اني ما كنت عارفه القبلة وكنت بحاول افتكرت وانا بصلي وكانت كل ركعة في اتجاه وقمت على كده

انا في مشاكل يا ماما وأبو بنتي هياخد بنتي و هروح لأهلي لأن احنا عيشين بره مصر من فترة طويل واستخرت الله سبحانه وتعالى  في  الأمر ده

sweetheart كتب:

الحلم رقم 10 
السلام عليكم يا ماما 
فى واحد قالى انه عاوز يرتبط بيا ويكلم بابا هو ظابط جيش بس هو منفصل وكان متجوز بس مش مطلق لسه ما طلقش مراته بس هو كل مره يجى يطلقها ومش بسببى على فكره يدخلوا ناس وهى مش عايزاه ولا هو عاوزها وفى بينهم طفل
المهم يا ماما انا بصراحه محتاره خالص ما بين رغبته فى انه يطلقها وانه يكون من نصيبى يعنى وكدا 
المهم انا حلمت انى بشتغل فى شركه وكان فى رحله طالعه تبع الشركه وكانت فى واحده هى مسئولة رحلات ومعروف انها احسن واحده تعرف تطلع رحلات يعنى تعرف الاماكن الممتازه المهم بصيت لقيت اننا فى ملاهى فى اليابان الملاهى دى عباره عن قطر كدا زى اللالعاب الحلزونيه الخطيره واللى يركبه بيكون نايم مش واقف ولا قاعد وكل عربيه بتشيل اتنين بس وبيكونوا جمب بعض نفرين يعنى المهم بقى بصيت لقيت الظابط دا نايم على ضهره من جوه وانا كنت خايفه خالص من القطر دا ومتردده لانه لعبه خطيره بس المكان اللى كان جمبه دا مكانى محجوز لى يعنى يعنى انا ركبت اهو بتاعى ماركبتش هيفضل فاضى وبعدين هو كان لابس لبس الجيش بتاعه بس كان لونه اخضر مش بيج وهدومه كانت طالعه من البنطلون كانت متبهدله كدا وانا قعدت اظبط له هدومه وهو نايم وهو كمان ساعتها كان بيعدل هدومه معايا بس خلص الحلم وهو نايم جوه القطر  وانا واقفه من بره ومش عارفه اركب ولا لاء
انا مدرسه وعمرى 32 سنه والحلم كان فى رمضان قبل الفجر 

toto كتب:

الحلم رقم (11)
حلمت ان اخويا واختى هما الاتنين جائوا لى وانا كنت فى الاوضة بتاعتى وهما دخلوا عليا اخويا قالى هاتى مائة جنيه واختى قالت هاتى 6 وحرف ز قولتلها يعنى ايه 6 ويعنى ايه حرف ز راح اخويا كررهم تانى وقالى هاتى واحد وستة وحرف ز وقالى واحد يعنى مائة جنيه وستة وحرف زين مقالش معناهم ايه
انا مفهمتش عايزين ستة الاف ولا 6 مئات ولا ستة جنيه ومش فاهمة يعنى ايه عايزين حرف زين  المهم قولتلهم حاضر وخلاص وصحيت من النوم على طول بعد كده
انا آنسة وحالتى الدينية متوسطة
واختى آنسة
واخويا عازب ولا يعمل

Aya Ahmed كتب:

الحلم رقم ١٢ 
ماما حلمت أني لابسه سلسله دهب ملفوفة مرتين يعني معموله  دورين

أنا انسه

نهر الحياه كتب:

السلام عليكم حلمت انى رأيت مفرش سفره ورايت أيضا انى معى شنطه سفر صغيره أضع فيها مفرش سفره وسرير وقفلت الشنطه وكانت خفيفه ووضعتها فى شنطه العربيه  انسه

حبيبه قلب احمد كتب:

ماما عامله ايه؟
اناحلمت بواحده صاحبتي اني روحتلها البيت وكانت واقفه في اوضه عندها بس شعرها كان مقصوص اوي زي الرجاله وخشن مع انه في الحقيقه. طويل اوي وناعم وكانت واقفه مع جوزها وبعد كده لاقيتها ملفوفه ببطانيه لوحدها علئ السرير زي الرول وجوزها ملفوف لوحده ببطانيه برضه بس بعيد .
وحلمت بيها حلم تاني انه انا روحتلها ازورها وبعد كده لاقيتها كانها كانت مع جوزها فيه جماع يعني 
وبعد كده طلعت وكانت بتضحك اوي وشوفت جوزها كانه مفصول عنها وانه هيستحمه وبيجيب لبس ليه واستغربت انها مش هي اللي بتجيب 
وفجاه لاقيتها قعدت في الصالون وبترفع جلابيتها وكانت تقريبا لونها احمر وجسمها كله مبقع بقع حمرا  كبيره وواضحه وانا خوفت من منظرها اوي رغم انها بيضا صاحبتي بس كانت باينه البقع 
واستغربت ان جوزها مش معاها وسايبها كده وحسيت انها بتضحك اوي واستغربت انها بتضحك وهيا كده. 
صاحبتي دي عندها مشاكل وهموم مع جوزها في الحقيقه