الحلم رقم (4)
انا صليت صلاة استخارة على امر محتارة فيه وحلمت ان احنا كنا فى يوم جمعة وكان وقت صلاة الظهر وانا اول ما سمعت آذان الظهر
استنيت شوية انا كنت فى البيت كنت بتفرج على التليفزيون واختى كانت قاعدة معايا
واختى التانية كانت بتستحمى فأنا قلت فى نفسى ياريتنى دخلت استحمى قبل اختى لانى عايزة اصلى الظهر لكن اضطريت استنى لما تخرج وبعد شوية سمعت اختى التانية اللى كانت بتتفرج معايا قالت انها عايزة تدخل تستحمى بعد اختى اللى فى الحمام فأنا مقدرتش اقولها ان انا كنت عايزة استحمى كمان
لكن خدت نفسى ومشيت طلعت على السطوح ووقفت على الاستراحة الاخيرة بتاعت السلالم وقررت اصلى صلاة الظهر على استراحة السلالم اللى كنت واقفة عليها حطيت السجادة فى اتجاه غلط مش ناحية القبلة كان تقريبا فى اتجاه الشمال
وانا فى اول ركعة اكتشفت ان انا مش لابسة حجاب كنت قاعدة بشعرى قلت لازم اعيد من الاول ونسيت ألبس الحجاب وبدأت اصلى تانى ونفس الحكاية اكتشفت بسرعة فى اول ركعة ان انا نسيت ألبس الحجاب فبصيت على حبل الغسيل علشان ادور على حجاب ألبسه لقيت هدوم كتير مغسولة وكان فى
هدوم مغسولة ليها فترة مش بنستخدمها ولقيت حجاب اخدته وكنت لسه هلبسه لكن سمعت اختى طالعة على السلالم قلت اكيد هتطلع عندى على السطوح وانا مش حابة انها تشوفنى وانا بصلى على السطوح فحطيت
سجادة الصلاة على حبل الغسيل وخدت الحجاب معايا ودخلت وانا بجرى على جوه علشان متشوفنيش وبعد ما هى طلعت لقيتها بتلم الهدوم اللى على حبل الغسيل وبعد ما لمتهم نزلت بيهم لكن هى ونازلة على
السلالم بصت عليا وشافتنى وانا قاعدة فى الاوضة اللى جوه على السطوح فأنا ابتسمت لها وهى كانت مستغربة شوية من تصرفاتى وبعدين انا بصيت شوية فى الاوضة اللى انا فيها على السطوح لقيت فيها مكان كان ممكن اصلى فيه لكن اختى خدت سجادة الصلاة معاها ففكرت اصلى على الارض والمرة دى فكرت فى ناحية القبلة الصحيحة
لكن خوفت وقلت فى نفسى ممكن يكون فى عقارب او حشرات لازم ادور على اى حاجة افرشها وأصلى عليها وكنت لابسة فى ايدى الشمال السبحة بتاعتى كنت لفاها على ايدى زى الغويشة
دورت على اى مفرش ملقيتش فرجعت فى كلامى وقررت انزل اقعد فى الشقة واستنى اختى التانية لما تخلص استحمام علشان انا ادخل وراها واستحمى جهزت هدومى اللى هلبسها بس كانت هدوم مش كتير
وقلت يارب اختى تخلص استحمام بسرعة لان انا لازم ألحق استحمى بسرعة علشان عايزة أصلى صلاة الظهر قبل ما يأذن العصر
انا آنسة وحالتى الدينية متوسطة
واخواتى البنات آنسات
