السلام عليكم ورحمة الله وبركاته
ازيك يا ماما نجية ، اخبارك ايه عاملة ايه ؟، كل سنة وحضرتك طيبة يارب ورمضان كريم ، بصي يا ماما معلش هتعبك معايا شفت يوم اتنين رمضان الرؤيتين دول كانوا بعد صلاة الفجر والاستغفار كتير ، شفت رؤيتين
الرؤية الاولى
شفت بابا بيمشي ببقوله رايح فين يا بابا، قالي رايح لامي (جدتي متوفية ) ، لو امي صحيت ولقت اللمة دي (اللمة الثقافية او منتدى ثقافي حاجة زي كده) عندها هتتخض ، وقمت من النوم على كده .
الرؤية الثانية :
شفت خير اللهم اجعله خير ، ان انا واقفة في مكان شغل وفي زي امتحان او مقابلة في( مكان زي وزارة او كده )وقاعدة في اوضة متوسطة الحجم ، فيها زي سكرتيرة بتسجل الاسماء ، وكان فيه ناس كتير قاعدين تانين، ففي واحدة معرفهاش بتقولي ، اتاكدتي ان اسمك موجود قلتلها اه ، رحت للسكرتيرة اسالها قالتلي اه اسمك متسجل من ضمن الاسماء الخمسة الاولي اللي في الكشف مكتوبين بالقلم الاسود الثقيل ، ببص على الكشف لقيت اسمي فعلا ، رحت قعدت مكاني و الغريبه كنت مطمنة كاني مذاكرة او عارفة ايه اللي هتسئل فيه ، ، فلقيت واحدة بتقول هفتح الانترنت اراجع منه بسرعة ، فواحدة بتسالني هتراجع ايه ، قلتلها طبيعي مدام احنا في وزارة البترول ان يسالنا مين وزير البترول والطاقة وكده؟ وقلت هعمل زيها بس حبيت استاذن السكرتيرة مرديتش مع ان الاوضة فيها كمبيوترات كتير ، فانا وعلت قلت كان نفسي اراجع طبيعي انها تسالني مين وزير البترول او كده ؟ بس كنت مش خايفة . وقمت من النوم على كده .
طمنيني يا ماما ايه الرؤيتين دول ، مع العلم ان عمي توفى بعد الرؤية دي بخمس ايام بس ، انا انسة 33سنة غير مخطوبة ومتخطبتش ، مقدمة في شغل في الجامعة في مكانين للتدريس في الجامعة لان معايا ماجستير وبحضر دكتوراه ، حالتي الصحية نص نص ، والدينية متوسطة وبقويها على اد مبقدر ، الخالة النفسية تعبانة لاني مريضة ووفاة عمي ، عدم ارتباطي بشخص اتمنيت انوا يكون زوج ليا ، قوليلي وطمنيني هل بابا هيتوفى هو كمان ، ولا الرؤية دي معناه ايه مع العلم جدتي متوفية من شهر 10 اللي فات ، وبابا اكبر اخواته .
وايه موضوع الرؤية التانية انا مش مقدمة في اي وزارة خالص انا مقدمة على شغل في الجامعة ، ونفسي فيه جدا جدا جدا .
