تفسير أحلام الجمعه 13/1/2011

[size=29]حلم رقم23

حلمت خير اللهم اجعله خير انا وبابا (عاطف)وماما(امال) واقفين بالعربيه بتاعتنا علي اول الشارع هانخرج مكان زي جنينه كده فسحه يعني وانا قبل ماركب العربيه قولتله انا عايزه ادخل الحمام لحظه بس ونزلت انا وماما ومشينا بس في مكان مش ناحيه شقتنا خالص لا ابعد في ناحيه جنب بيت عايزين نشتريه شفت بنت صحبتي من ايام الاعددادي اسمها هند سلمت عليها وقولتلها مافيش جديد ولا خطوبه قالتلي لا بس ومشيت وجايين نطلع عماره العماره دي عماره عمي القديمه وكان في مجاري تحت العماره والناس حطين طوب نطلع عليه وطلعنا في الدور الارضي في ست كلمتنا وبعد كده طلعنا[ في كذا دور في كل دور في يافطه كبيره مكتوب عليها حاجه تبع الناس بتوع مبارك يعني عن صفوت الشريف والناس دول في كل دور وماما بتبص مش بتلاقي حد في الشقه مفتوحه ومفيهاش حد جينا في الدور اللي قبل الاخير ماما بتبص لقيت مبارك نايم علي سرير ماما قالت حاجه زي اللي ينتقم منكم او حاجه كده وقالت الناس اللي ظلمتوها احسن منكم او شئ من هذا القبيل رد مبارك عليها عندك حق او كلامك صح يعني بس وطلعنا للدور الاخير ولقينا عمي (محمود) وصحبت ماما(سنيه) انا استغربت ايه اللي جابها في شقه عمي

بس بص صحيت متغاظه عشان شفت مبارك في الحلم

انسه22سنه وملتزمه الحمدلله

/size]

25

26

السلام عليكم ورحمة الله وبركاته

إزيك يا ماما نجية يا رب دايما تكونى بكامل الصحة والسعادة

بصى يا ماما يا قمر أنا الحقيقة مش أنا اللى حلمت لا ده أخويا حلم حلم خاص بيه أنا هوه فى الصف السادس الإبتدائى وسبحان الله هوه مش كان هيقولهولى لولا إننا كنا بنخانق علشان هوه عايز يسمع لى القرىن اللى حفظته وأنا قولتله لأ لأنى تقريبا مش كنت حفظت لسه أو هوه كان بيهرب من المذاكرة وقال لى أنا حلمت بيكى من أسبوع واقفة فى محل من بتوع المول إحنا فى قرية وفيها مول كبير فيه قهوة وقاعة افراح وبقالة ومقلة وحاجات كتيرة هوه قال لى إنى كنت واقفة فى محل منهم وببيع مصاحف ولابسة نقاب أسمر وفيه مساعدين لى يعنى أنا المديرة لأنه قال إنى لى مكتب وهما المساعدين بيخدوا الفلوس من الناس وبيعطوهم لى وكانت فلوس كتيرة ما شاء الله وكانوا ناس كتيرة فى اعمار مختلفة بيشتروا مثلا أم وأبنها بيقولها هاتيلى المصحف ده

أنا حالتى الدينية بحاول اكون كويسة لكن للأسف مش بصلى الفجر حاضر وإنهارده أول يوم اصليه حاضر من بعد سماعى للحلم وبدأت أحفظ القرآن من قبل الحلم طبعا بأسبوع أو 2 وحجابى كبير لكن مش نقاب يعنى بس بفكر فيه من فترة بالرغم إنى من سنة كنت رافضاه تماما
طبعا مش بشتغل لكن الحمد لله مستورة
مش مرتبطة لا مخطوبة ولا متزوجة
يا ترى تفسيره ايه وليه مش انا اللى حلمت بيه أخويا هوه اللى حلم بيه

الحلم رقم 27
اذيك يا ماما نجية خير اللهم اجعله خير. حلمت بخالتى جت بيت تيتة واحنا كلنا موجودين وقالت انا جايبالكوا مفاجاة والمفاجاة طلعت بنت صغيرة وبتقول انا خلفت ودى بنتى واحنا استغربنا كلنا لان بنت كانت جميلة وكانت بتمشى وبتتكلم . وبعدها بشوية خالتو قالتلى روحى غيرى لشيمار ده كان اسم بنت وكنا طول الحلم نندهلها بشوشو وانا طول الحلم بهتم بالنت دى والعب معاها واحميها وخلص الحلم على كدة.
انا انسة عندى24 سنه متدينة والحمد الله . وخالتو متجوزة وعندها بنتين كبار

حلم 28
ازيك ياماما نجيه انا كان متقدملى عريس وكنت بستخير ربنا ف حلمت بالراجل اللى جايبهولى ان هو بيقولى انتى لازم تعملى مشروع تخرجك قبل ما تخلصى امتحاناتك وبيقولى انا جبتلك الحاجات اللى هتعملى بيها مشروع التخرج بس انا مش فاكره بقية الحلم
وحلمت حلم كمان بواحد كان متقدملى من فتره ومحصلش نصيب ان مامته بتكلم ماما علشان يرجع فماما قالتلها انى اتخطبت وقالتلى لو عايزه ترجعى له ماشى فانا قولتلها لا واكنى لسه متخطبتش بس ماشيه فى الموضوع يعنى الموضوع بيتم بس لسه ملبستش دبل