دلوقتى انا كان جايلى قلق امبارح لكون مش هتجوز غير بعد سبع سنين لانى كل ما افتكر الحلم اللى قولتلك عليه يا ماما قبل كده انى واحدة فسرتلى حلم انى مش هتجوز غير وانا 28 سنة لما حلمت ان اختى بتقولى هتموتى وانتى عندك 28 سنة باين ..انا كنت حكيتلك عليه قبل كده يا ماما فقولت يلا اهو برده شكلى بقا هحضر دراسات الاول وبعدين ارتبط وكان الهاجس ده مسيطر عليا
وبعدها سبحان الله شوفت حلم حاسة انه خير فشوفت روحى امبارح انى زى ما يكون جايبة لبس جديد فى شنطة كده وكان عبارة عن قميص وبنطلون وكان عندى امتحان وقال ايه الامتحان ده همتحنه فى البيت والمفروض انى مش همتحن الامتحان ده غير لما البس اللبس الجديد وفعلا لبسته الاول وبعدين قعدت امتحن بس زى ما يكون كنت بمتحن براحتى يعنى الوقت كنت مش ملتزمة بيه اوى ....طبعا يا قمر انتى اكيد عارفة انى بعمل دراسات عليا وبعدين انا اصلا مش عايزة اخدها بسرعة اهو على راحتى يعنى
اه اه قبل ما انسى انا على فكرة قمت من النوم وقعدت شوية وبعدين قلت انام تانى طالما انا صاحية بدرى اوى كده المهم
كان فيه بنت زميلتى من المنصورة كنت قولت لاخويا عليها وبعدين كنت شوفت منام انى قال ايه رايحة اجيب جزمة جديدة بتاعتى من هناك فى المنصورة فروحت ملقيتهاش موجوده زى ما يكون اتاخدت وبعدين كلمت ماما فبتقولى انتى ازاى ملحقتيهاش وجبتيها من اول مرة فقولتلها مكانش معايا فلوسها كلها ومش لحقتها فقالتلى طب مش قولتلى لاخوكى يساعدك فى تمنها ليه قلتلها خلاص بقا يا ماما مش مشكلة قالتلى يعنى كنا هنلاقى المواصفات دى تانى !!! فروحت بعدها البيت لقيت اخويا جايب موبايل جديد وحديث وكان مقفول لسه مش اشتغل ولقيته بيتوضا وبيصلى العصر وبعد ما اتم الصلاة ورجع يشوف الموبايل لقاه مفتوح ولقيته بعدها شغال عادى فقولت خلاص مش همسك موبايله عشان ده خاص بيه مدام اتفتح وبقا شغال وكان ماركته حلوة اوى هوه اجدد من اللى هوه ماسكه كمان بس حلو وفخم وكان لونه اسود
معلومات ممكن تفيد فى التأويل :
دلوقتى انا قمت انهارده من النوم لقيت البنت اللى هى من المنصورة دى اتخطبت وعلى فكرة هوه الباب ده ماما مش كانت مشجعاه اوى لانها منقبة وصاحبتى وان شافها فى بيتهم ودخل البيت ومحصلش وفق كان هيبقى احراج فماما كانت تتمنى ان كانت من غير نقاب اقله يشوفها من بعيد بس اخويا بس اللى كان بيسالنى عليه مجرد فضول وبرده مش متمسك اوى لكن هوه فى الحقيقة معجب ببنت تانية ونفسه يخطبها بس موضوعها صعب حبتين ونفسه يتم بس نسال الله التساهيل وعلى فكرة انا لقيته انهارده عايز يكلم باباها عشان يديله الرد النهائى لان هما مستواهم المادى عالى اوى واحنا الحمد لله فوق المتوسط كمان بس هما ماشاء الله اكتر شويه فالقلق جاى من كده ان يكون الاعتراض على النقطة دى و هوه بقاله فترة مش كلم باباها عشان يعرف منه الرد والموضوع معلق ربنا يجبر بخاطره هوه واللى زيه ياااااااااااااارب
من حق يا ماما انا عرفت دلوقتى ان البنت اللى زميلتى من المنصورة دى مش اتخطبت ولا حاجة هى بس متقدملها واحد تقريبا وبتتهرب منه او بتطفشه باين وده سبب من اسباب عدم ارتياحى شخصيا للباب ده لان انا عارفة اناه غامضة كده وليها تصرفات عجيبة بس هوه زن اخويا شوفيلى عروسة شوفيلى عروسه فقولت على دى وانا مش مالية ايدى اوى وده كان قبل ما يشوف البنت اللى معجب بيها دى ..وبعدين ان اعتبرنا الحلم عليا انا فهيبقى مش واقعى لان انا مليش حد فى المنصورة كعريس ومفيش امكانية لحاجة زى كده اصلا بدليل انى حتى لما قبل ما احمد يفسخ وقبل ما اعرف ان هيتهبل ومحتمل يرجع انا شوفت قبلها انى فى اسكندرية بقيس جزمة من هناك وقررت انى مش هاخدها يعنى مش هاخدها واحمد من اسكندرية اصلا وبالفعل انا رفضت ارجع لموضوع احمد
