rkblue]8]السلام عليكم ورحمة الله وبركاته
ازيك يا ماما نجية ايه اخبارك ، بصي يا ماما انا حلمت حلمين في وقتين مختلفين
الحلم الاول :
حلمته قبل الفجر قبل ما اقوم اصلي الفجر حلمت ان انا قاعدة في مكان كوافير حريمي وواقفة معايا واحدة بتشتغل هناك في المحل وجيبالي لوحة كده عليها الوان الصبغة اللي نلون بيها الشعر وانا ادامي باروكة او عينة برضه مش فاكرة ولون الشعر اللي فيها عجبني جدا اللي هو اللون العنابي (لون شعر رجاء الجداوي ونبيلة عبيد كده) وانا عجبني اللون جدا ، بس البنت اللي في الكوافير بتقولي اللون ده مينفعكيش انتي الاحسن ليكي تخدي لون على درجات البني وراحت مورياني لوحة عليها الوان ودرجات البني ولقيتها بتقترح عليا اخد اللون البني وادخل معاه لون تاني ذهبي او ترابي بحيث ميبقاش بني اوي قالتلي نعمل لونين مع بعض احسن وقمت من النوم على كده .
الحلم الثاني :
حلمته ساعة اذان الظهر قمت من النوم كان اذان الظهر اذن من 10 دقايق ودي برضه اخر حاجة شفتها ، حلمت ان انا واهلي في شقة تانية غير بيتنا وان انا بفتح الدولاب لقيت الرف بتاعي مكسور عبارة عن لوحين جنب بعض ومبقتش عارفة اعمل ايه احط الهدوم ازاي فيه قعد احاول اوسطن الرفين او الجزئين دول وقعدت اقول ممكن احط هنا قمصان رجالي بحيث تكون خفيفة وفي نفس الوقت الرف يستحملها وفعلا مديت ايدي فوق في رف تاني لقيت قمصان رجالي لفت نظري فيهم قميص لونه موف فاتح جدا وكان مكوي ونضيف .
المهم سبت الدولاب ورحت خرجت بره بلف في الصالة لقيت التلفزيون شغال وبابا بيبص على المشترك اللي في الكهربا وقام قفله لان المشترك مهزوز وممكن يعمل قافلة ،
باب الشقة خبط رحت افتحه لقيت ماما واختي داخلين لسه الشقة ، وانا بكلم ماما واختي لقيت نفسي فجاة كده كاني استحميت وغيرت هدومي ولابسة فستان بيت قصير وتحتيه لابسه ملابس داخلية لونها أبيض ، الفستان لونه ابيض نصه اللي فوق ابيض سادة نصه التحتاني مقلم ابيض في موف في اسود (اللون ده لون بنطلون بيت عندي فعلا بلبسه في البيت ) وقعدت اعدل في هدومي وكنت خايفة لحسن الفستان يجي اقصر من الهدوم الداخلية(الكومبليزون)لونه فسدقي فاتح جدا من كتر ما هو فاتخ تحسي انه ابيض بس لما اركز الاقي درجة الفستدفي الفاتح ، وشعري مبلول مغسول ونضيف وبيلمع وبينقط ميه وقمت من النوم على كده .
دا ايه يا ماما انا قلقانة من الرف المكسور ، انا انسة 32 سنة غير مخطوبة ولا متزوجة طبعا ، بحضر في الدكتوراه لسه ببدء فيها ، مقدمة في شغل والدنيا واقفة معايا خالص
حالتي الدينية متوسطة بس حريصة على صلاة الفجر ، حالتي النفسية قلقانة وتعبانة جدا وخايفة لمتجوز وافضل كده لوحدي العمر كله ، طمنيني يا ماما الله يكرمك دا ايه . [/size]
